Специјалната јавна обвинителка Катица Јанева, со истражители од МВР, изврши претрес во канцеларијата на судијата Владимир Панчевски, против кого, како што изјави Јанева, СЈО води предистражна постапка поради злоупотреби на системот за распределба на судски предмети и за оддавање службена тајна, објави агенцијата МЕТА.
Претресот на СЈО во Кривичниот суд почна вчера околу пладне и траеше пет часа, а покрај канцеларијата на Панчевски, претреси биле извршени и во канцелариите на двајца информатичари, вработени во судот.
„Денеска по судска наредба, СЈО изврши личен претрес кај лицето Владимир Панчевски и со друга наредба од судот ги одзеде сите податоци од компјутерскиот систем за распоредување предмети во Основниот суд Скопје 1“, изјави Јанева, додавајќи оти се надева дека СЈО наскоро ќе почне со истрага.
Јанева се сомнева дека Панчевски местел кои судии да ги добиваат предметите на СЈО, а покрај тоа, постојат и сомнежи дека тој оддавал службени тајни на лица надвор од судот.
Инаку, Панчевски е поранешен претседател на Кривичниот суд во Скопје, а четиригодишниот мандат на оваа функција му истече на почетокот на декември минатата година.
Во Кривичниот суд денеска беше и комисијата на Министерството за правда, која треба да утврди дали има злоупотреби со автоматизираниот систем за распределба на предмети.
Претседателот Лазар Нанев, изјави дека Комисијата ќе продолжи со контролата во судот, но не откри дали се утврдени некакви неправилности со автоматизираниот систем за управување со судските предмети (АКМИС).
Индиции за злоупотреби на АКМИС беа нотирани и во извештајот на експертската група на Европската комисија, предводена од Рајнхард Прибе.
извор: МЕТА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
