Светска банка ја ревидираше пролетната проекција за раст на Северна Македонија, и таа сега е намалена за 0.7 проценти , со што земјава и годинава ќе има најмал економски раст во регионот.
Според прогнозите на банката, нискиот раст во однос на земјите од регионот Северна Македонија ја очекува и во наредните три години, додека јавниот долг незначително ќе се намали. Дополнително, од Светска банка изразија загриженост за кредитите што земјата ги зема од Унгарија и како тие ќе влијаат врз јавниот долг и дефицитот.
Како што стои во извештајот на Светска банка кој беше презентиран денес, наместо очекуваните 2,5 проценти кои ги прогнозираше Светската банка во пролетната проекција, државава ќе ја заврши годината со економски раст од само 1,8 отсто. Според најниовиот извештај на Светска банка за Западен Балкан, замјава ќе ја заврши годината со фискален дефицит од 4,9 проценти, просечна стапка на инфлација од 3,5 проценти и јавен долг од 63.5 отсто.
Намалувањето се должи на немањето реализација на Коридорите 8 и 10Д но и поради проблемите во енергетиката, а како главни причини за нискиот економски раст во земјава во извештајот се набројани растот на цените, бавното темпо на реализиација на јавните инвестиции, миграцијата, економската рецесија кај главниот трговски партнер на земјава Германија, но и воените конфликити во Украина и на Блискиот Исток.
Според извештајот на Светската банка, позитивен имплус во македонската економија би можел да донесе Планот за раст на Европката унија, додека за заемот од Унгарија, иако го оценуваат како доста поволен, сметаат дека ќе го зголеми јавниот долг во иднина.
Најдобра економска состојба во регинот имаат Србија и Косово, кои ќе ја завршат годинава со раст од 3,8 проценти. Зад нив е Црна Гора со проектиран раст од 3,4 отсто, Албанија со 3,3 проценти, а Босна и Херцеговина ќе ја заврши годината со раст од 2,8 проценти.
М. Д.
