Игор Тантуровски, претседател на Државната комисија за спречување на корупција не чувствува никаква одговорност и потреба за оставка по обвинувањето за корупција на антикорупционерите. Единствено што чувствува е политички притисок, јавуваат медиумите. За потсетување на јавноста, ЦИВИЛ побара оставка од Тантуровски и останатите членови на ДКСК уште во декември 2017 година. Во истото соопштение, ЦИВИЛ побара оставки и од ДИК. Но, ни по засилените јавни барања за оставка, одговорност нема.
Во соопштението од 12 декември 2017 стои:
ЦИВИЛ бара од ДКСК, пред да поднесе оставка, да поднесе целосен извештај за трошењето на јавните пари од оваа институција, според Законот за слободен пристап до информации од јавен карактер (член 4 и член 12).
За да не дојде до недоразбирање, ЦИВИЛ не бара да се откриваат приватните податоци на членовите на ДКСК, но јасно и прецизно да се наведат збирните трошоци за плати на членовите на ДКСК, како и за хонорарите и бонусите во институцијата. Како и во случајот со ДИК, ЦИВИЛ бара ДКСК да даде податоци за патните трошоци во земјата и во странство, како и причините и резултатите од тие патувања, трошоци за репрезентација, сите јавни набавки и трошоци за комуникација во периодот 14 април 2015 до 12 декември 2017 година.
Колумнистот на ЦИВИЛ Медиа и член на Експертскиот борд на ЦИВИЛ, д-р Сашо Орданоски, добро забележува дека оваа институција не работи ништо, освен што ги троши јавните пари. Поточно, речиси ништо, бидејќи ДКСК беше значаен дел од жестокиот, последен напад врз граѓанското општество, пред самиот крај на режимот на Никола Груевски. По налог на ДКСК, 22 организации беа нападнати во јавноста и беа подложени на апсурдни истраги од инспекциите на УЈП со единствена цел – да се изврши притисок и да се попречи работата на истакнати организации на граѓанското општество.
Во рамките на мониторингот на институциите и политичките партии во текот на изминатите години, ЦИВИЛ во континуитет објавуваше извештаи и анализи за партизираноста, нискиот квалитет на работата и сериозни злоупотреби и кршење принципите на транспарентност и законитост во повеќе институции во земјата.
Во таа смисла, ЦИВИЛ побара оставка од ДИК на 11 декември 2016 година, веднаш по затворањето на гласачките места на предвремените парламентарни избори кои се спроведоа на тој датум.
Следејќи ги индикациите за сериозни злоупотреби во ДИК, организацијата побара пристап до јавните информации по низа основи, вклучувајќи ги и бонусите, јавните набавки и патните трошоци. ДИК одби да ги даде податоците со образложение дека тоа не се информации од јавен карактер. По реакцијата на ЦИВИЛ и американскиот амбасадор, а најмногу од револтираната јавност, ДИК прво се обиде да се оправда, но потоа обелодени дел од податоците, почнаа и оставките. Тоа не е доволно!
Освен враќање на средствата од бонусите и оставките од сите членови на Државната изборна комисија, ЦИВИЛ бара одговорност за злоупотребите и незаконското работење. Паралелно со тоа, ЦИВИЛ бара од ДКСК веднаш да одговори на поставените прашања, според Законот за слободен пристап до информации од јавен карактер, а веднаш потоа да поднесе оставка и одговорност.
ЦМ
