Во очекување на одлуките од Управен суд по тужбите поднесени од политичките партии, по подбиените приговори од Државната изборна комисија, учесниците во изборниот процес според Изборниот законик и ревидираниот роковник, имаат уште преостанати обврски. Барем во делот на рекламните паноа и билборди и политичкото финансирање.
Членот 78-а од Изборниот законик го регулира поставувањето на рекламни паноа и билборди за политичко рекламирање за време на изборната кампања. Покрај останатите одредби уредени со овој член, она што останува обврска по завршување на изборите (15 јули), правните лица кои стопанисуваат со рекламните паноа и билборди се должни да поднесат извештај за доделените локации за секој учесник во изборната кампања, средствата кои се побаруваат од секој учесник како и средствата кои се наплатени. Извештајот се поднесува најдоцна 15 дена по денот на завршување на изборната кампања.
Според Изборниот законик единствена обврска на учесникот во изборна кампања, предено со член 79 е должноста во рок од 30 дена по завршување на изборите да го отстрани сметот од плакатите. Доколку извештајот не се поднесе на време Изборниот законик, член 184, став 3 предвидува глоба во износ од 10.000 евра во денарска противвредност на правните лица кои стопанисуваат со рекламните паноа и билборди доколку извештајот од член 78-а став 12 не го достават до надлежните институции и во определениот рок. Глоба во износ од 30% од одмерената глоба на правното лице ќе му се изрече и на одговорното лице во правното лице.
Член 185 од Изборниот законик, предвидува глоба во износ од 2.500 евра во денарска противвредност за регистрирана политичка партија, коалиција односно независен кандидат ако во рокот утврден од членот 79 став 2 не го отстрани сметот од плакатите. Глоба во износ од 30% од одмерената глоба за политичката партија, коалицијата односно независниот кандидат ќе му се изрече на овластеното лице на политичката партија, коалицијата односно независниот кандидат за прекршокот. Член 186, пак, одредува глоба во износ од 1.000 до 2.000 евра во денарска противвредност за прекршок за физичко лице кое врши уништување на изборни плакати или лепење плаката преку друга плаката на учесник во изборна кампањана места определени за нивно истакнување
Според член 84 –б учесникот во изборната кампања е должен во рок од 20 дена од денот на настапување на предизборниот молк за првиот круг(13 јули) и вториот круг на гласање доколку се одржува, да поднесе извештај со спецификација на трошоците за приходите и расходите на трансакциската сметка за изборна кампања од денот на нејзиното отворање до завршувањето на првиот изборен круг, односно најдоцна до 1 август. Учесникот во изборната кампања е должен на 11-тиот ден од денот на изборната кампања, да поднесе Извештај со образец за примените донации на трансакциската сметка за финансирање на изборната кампања. Учесникот во изборната кампања е должен еден ден по завршување на изборната кампања да достави Извештај со образец за примените донации на трансакциската сметка за финансирање на изборната кампања. Учесникот во изборната кампања е должен еден ден пред одржување на вториот круг на гласање, да достави Извештај со образец за примените донации на трансакциската сметка за финансирање на изборната кампања.
Според член 85 учесникот во изборната кампања е должен веднаш, а најдоцна во рок од 30 дена од денот на затворање на трансакциската сметка да поднесе вкупен финансиски извештај со спецификација за трошоците за приходите и расходите во изборната кампања.
Член 188 –а предвидува глоба во износ од 9.000 евра во денарска противвредност за прекршок на политичка партија, коалиција односно независен кандидат ако не поднесат извештај за финансирање на изборната кампања од членот 85, односно кога за финансирање на изборната кампања се користени средства согласно со членот 83 од овој Законик. Глоба во износ од 9.000 евра во денарска против вредност ќе се изрече на политичка партија односно коалиција односно независен кандидат доколку во изборната кампања потроши повеќе финансиски средства отколку што е утврдено во членот 84 од овој законик. Глоба во износ од 30% од одмерената глоба за политичката партија, коалицијата односно независниот кандидат ќе му се изрече на овластеното лице на политичката партија, коалицијата односно независниот кандидат за прекршокот од ставот (1) на овој член. Глоба во износ од 9000 евра во денарска противвредност ќе им се изрече за прекршок на политичка партија, коалиција односно независен кандидат ако не поднесат извештај за финансирање на изборната кампања во предвидениот рок од членот 84-б од овој законик.
Предвремените парламентарни избори завршија на 15 јули со неофицијални конечни резултати според кои Коалицијата Можеме доби 46 мандати, ВМРО-ДПМНЕ 44 мандати, ДУИ 15 мандати, Алијанса за Албанците и Алтернатива 12 мандати и Левица 2 мандати.
Б. Ј.
