„Полека Република Македонија западна во еден зимски сон, и ако не се некои од невладините организации или некои од колумнистите не можеме да се пробудиме, но мислам дека изјавата на претседателот на Владата, Зоран Заев, дека новото име ќе биде Илинденска Македонија, прилично сите не шокираше, и почна да се раздвижува државата или сите ние“, рече Павле Трајанов од Демократски сојуз на денешниот јавен настан „Аларм: Слободни избори, услов за кој (не) се преговара“ во организација на ЦИВИЛ – Центар за слобода.
Трајанов додаде дека треба да се сугерира на Владата да се направи една работна група која што ќе работи на промена на Уставот на Република Македонија, и дека не може постојано да бидеме во криза и да викаме дека Уставот е добар, а лоши се другите решенија. Според него, нема да има длабоки и суштински реформи доколку не се променат одредени решенија во Уставот, врзани за судството, за улогата и позицијата на Претседателот на државата кои што смета дека неговите уставни овластувања треба во голема мера да се редуцираат и треба да се зајакне самостојноста на Уставниот суд, да нема политичко влијание врз него.
„Една од крупните промени, за да не ни се случи повторно да сите ние сега да поддржиме нов авторитарен систем и лидер, затоа што системот во Република Македонија, претседателот на партијата што владее сите работи тој ги решава и сите што имаат какви било идеи, сите патишта водат кон Претседателот на Владата“, рече Трајанов.
Според него, еден од крупните промени кои можат да придонесат за демократизација на државата е изборниот модел, и овој модел како што функционира сега покажува дека ги фаворизира големите партии и дека помалите политички партии немаат шанса.
„Постојниот изборен закон ги фаворизира првите најголеми четири политички партии. Тие од 1 до 4 се ставаат на гласачкото ливче, имаат две третини од медиумското време, па билборди, вклучување само од кај нив членови во избирачки одбори, изборни комисии, па се до централна изборна комисија. Целиот концепт е конструиран да да не може да ја наруши удобноста на една или друга политичка партија, зависно која е на власт, која е во опозиција, и тие две партии имаат непишан договор ако се појави нова сила или групација, да направат се таа да биде ослабната“, додава Трајанов.
Тој смета дека прв чин на демократизација на Македонија или реален одраз на гласачите, ќе биде доколку Македонија има една изборна единица, и дека обврска на невладиниот сектор, медиумите и експертите e да притискаат Македонија на следните избори да биде една изборна единица.
Ангела Петровска
Камера: Атанас Петровски
Монтажа: Биљана Јордановска
