Претседателот на САД, Доналд Трамп, во петокот изјави дека веројатно ќе се знае за 24 часа дали палестинската милитантна група Хамас се согласила да го прифати она што тој го нарече „конечен предлог“ за прекин на огнот меѓу Израел и Хамас во Газа.
Како што пренесува Ројтерс, Трамп исто така, рекол дека разговарал со Саудиска Арабија за проширување на Абрахамскиот договор, договорот за нормализација на врските што неговата администрација го договори меѓу Израел и некои земји од Заливот за време на неговиот прв мандат.
Трамп во вторникот изјави дека Израел ги прифатил условите потребни за финализирање на 60-дневниот прекин на огнот со Хамас, за време на кој страните ќе работат на завршување на војната.
Запрашан дали Хамас се согласил со најновата рамка за договор за прекин на огнот, тој одговори:
„Ќе видиме што ќе се случи, ќе знаеме во текот на следните 24 часа“.
Извор близок до Хамас изјави во четврток дека исламистичката група бара гаранции дека новиот предлог за прекин на огнот, поддржан од САД, ќе доведе до крај на израелската војна во Газа.
Двајца израелски претставници изјавија дека тие детали сè уште се разработуваат. Десетици Палестинци беа убиени во четврток во израелски напади, според властите во Газа.
Претходниот двомесечен прекин на огнот заврши кога израелските напади убија повеќе од 400 Палестинци на 18 март. Трамп претходно оваа година предложи преземање на Газа од страна на САД, што беше осудено глобално од експертите за човекови права, ОН и Палестинците како предлог за „етничко чистење“.
Д. Мишев
