Поротата на судот на Менхетен во Њујорк пресуди дека поранешниот американски претседател Доналд Трамп е виновен за сексуално злоставување на колумнистката и новинарка Е. Џин Керол, објави Си Ен Ен. Поротата го ослободи поранешниот американски претседател од обвиненијата за силување, а судот утврди дека Трамп е должен на жртвата да и плати отштета од пет милиони долари.
Доналд Трамп сексуално ја злоставувал Е. Џин Керол, а потоа ја клеветел нарекувајќи ја лажга, одлучи поротата. Деветчлената порота во федералниот суд на Менхетен ги отфрли негирањата на Трамп дека ја нападнал Керол и пресуди во нејзина корист.
Трамп не присуствуваше на судењето, но беше прикажано неговото видео сведочење во кое тој ги негираше обвиненијата. За да го прогласи за одговорен, поротата од шест мажи и три жени мораше да донесе едногласна пресуда. Расправата траеше нешто помалку од три часа.
Тој е осуден во судски процес кој беше граѓанска тужба, а не кривично гонење, поради што единствената санкција со која ќе се соочи е финансиската.
Керол го обвини Трамп дека ја силувал пред 27 години, во пролетта 1996 година, во гардеробер во стоковна куќа во Њујорк. Тој ги отфрли обвинувањата, наведувајќи дека таа не е негов тип на жена и дека сето тоа го направила за да ја зголеми продажбата на нејзината книга.
Г. Т.
