Потегот на Доналд Трамп да го намали поголемиот дел од финансирањето на САД за странска хуманитарна помош би можел да предизвика повеќе од 14 милиони дополнителни смртни случаи до 2030 година, според истражување објавено во медицинското списание „Лансет“, пишува Би-Би-Си.
Една третина од оние кои се изложени на ризик од предвремена смрт се деца, открива истражувањето.
Државниот секретар на САД, Марко Рубио, во март изјави дека администрацијата на претседателот Трамп откажала над 80% од сите програми на Агенцијата на САД за меѓународен развој, или УСАИД.
„За многу земји со ниски и средни приходи, резултирачкиот шок би бил споредлив по обем со глобална пандемија или голем вооружен конфликт“, изјави Давиде Расела, коавтор на извештајот на „Лансет“.
Намалувањата на финансирањето „ризикуваат нагло да го запрат – па дури и да го вратат назад – две децении напредок во здравството кај ранливите популации“, додаде Расела, истражувач во Институтот за глобално здравје во Барселона.
Извештајот доаѓа во време кога десетици светски лидери се среќаваат во шпанскиот град Севиља оваа недела на конференција за помош предводена од Обединетите нации, најголемата во последната деценија, се наведува во статијата на Би-Би-Си.
Освртувајќи се на податоците од 133 земји, тимот истражувачи процени дека финансирањето на УСАИД спречило 91 милион смртни случаи во земјите во развој помеѓу 2001 и 2021 година.
Тие, исто така, користеа моделирање за да проектираат како намалувањето на финансирањето за 83% – бројката објавена од американската влада претходно оваа година – би можело да влијае на стапките на смртност.
Намалувањата би можеле да доведат до повеќе од 14 милиони смртни случаи што може да се избегнат до 2030 година, покажаа проекциите. Тој број вклучува над 4,5 милиони деца под петгодишна возраст – или околу 700.000 смртни случаи кај деца годишно.
Администрацијата на Трамп, претходно предводена од иницијативата за намалување на трошоците на милијардерот Илон Маск, имаше за цел да ја намали федералната работна сила. Исто така, го обвини USAID за поддршка на либерални проекти.
