Министерката за труд и социјална политика Јованка Тренчевска заедно со градоначалникот на Струмица Костадин Костадинов и директорката на Државен санитарен и здравствен инспекторат Рената Младеновска го отворија инклузивното игралиште во клон 3 од јавната детска установа „Детска радост“ во Струмица.
-Како Министерство се залагаме секое дете да добива соодветна грижа и услови за соодветен раст и развој, затоа се градат се повеќе градинки, се зголемуваат капацитетите со цел секое дете да има можност да биде дел од предучилишното воспитание и образование, рече министерката во своето излагање.
Таа посочи дека особено е запазена социјалната компонента во градинките и можноста на секое дете да биде вклучено во детската игра.
-Ме радува тоа што со овозможувањето на вакви игралишта придонесуваме кон тоа раскажувањето на децата за нивните денови во градинката да не бидат проследени со негативни чувства на неприфаќање, туку среќни детски спомени, истакна Тренчевска.
Градоначалникот на Струмица Костадин Костадинов ја истакна одличната соработка меѓу Општината и Министерството за труд и социјална политика, посебно со изградбата и пуштањето во употреба на новата детска градинка „Виножито“.
-Покрај добрата соработка и ангажманот на Министерството за труд и социјална политика и на Светска банка и ние како Општина имавме обврски од кои само за инфраструктурата околу градинката вложивме 20 милиони денари од изворниот буџет. Сакам да ги запознаам граѓаните дека во соработка со Бирото за рамномерен регионален развој имаме добиено проект за пробивање на нова сервисна улица која не само што е важна за новата градинка, туку и за граѓаните кои живеат во населбата Касарна, рече Костадинов.
При посетата на градинката од страна на Министерството за труд и социјална политика во соработка со Државниот санитарен и здравствен инспекторат беа доделени играчки за градинката.
Инаку, со поддршка на Кинеската амбасада вакви инклузивни игралишта се изградени и во Крушево и Кривогаштани.
Фото: архива
