Израел доби список на заложници кои треба да бидат ослободени во недела во согласност со договорот потпишан со Хамас, соопшти кабинетот на израелскиот премиер, објави Си-ен-ен.
Според соопштението, безбедносните службеници го проверуваат списокот, а информацијата е пренесена до семејствата на заложниците.
Списокот го означува третиот ден од објавувањето на примирјето. Според договорот, вкупно 50 заложници се очекува да бидат ослободени во текот на четирите дена, во замена за одреден број палестински затвореници.
Дваесет и четири заложници – вклучувајќи 13 израелски цивили и 11 странски државјани, беа ослободени во петокот, а потоа уште 17, од кои 13 Израелци и четворица тајландски државјани, беа ослободени во саботата.
Шеесет и еден камион испорача храна, вода и итни медицински материјали во северниот дел на Газа во саботата, според Обединетите нации, што е најголемиот број камиони што стигнале на север од нападите на Хамас врз Израел на 7 октомври.
