Американскиот онлајн сервис за вести и социјална мрежа, Твитер, денеска соопшти дека нивната онлајн платформа е сериозно разнишана. По неколкуте обиди да се искористат постојните капацитети, компанијата ги вклучила сите резервни сервери за да го издржат оптоварувањето. Бордот за решавање кризни случаи размислува, доколку проблемот не се реши до крајот на денот, да набави неколку нови танкери со сервери од Кина и да ги стави во погон во текот на оваа ноќ која директорите на Твитер ја нарекоа критична.
За што се работи? Неодамна, Твитер, под притисок на меѓународната јавност, се вклучи во глобалната борба против говорот на омразата и лажните вести. Со таа цел, Твитер инсталира интелигентен софтвер за лов на облици на оваа глобална закана, но софтверот има една додатна карактеристика – реагира на глупост.
Така, новиот софтвер на Твитер, се преоптоварил од нивото на глупост што дел од македонската твитер заедница го пласира на оваа социјална мрежа. Лажните вести и говорот на омразата некако и може да ги поднесе, но овој интелигентен софтвер, едноставно, доживеал колапс кога детектирал колкава е глупоста на некои од македонските твитер „филозофи“. Овој проблем потоа предизвикал шок и енормно оптоварување на серверите на компанијата.
„Со сета почит кон слободата на изразувањето на сопствената глупост, сепак, се молат македонските онлајн ашљаци да намалат малку од своето доживување, додека не го решиме проблемот со нашиот софтвер чија реакција доведе до преоптоварување на серверите“ – се вели во заклучокот од соопштението на компанијата.
Александар М. Арнаудов – Роки
