Општина Новаци на својата официјална веб страница посебно го истакнува податокот истражен од турски тефтери во кои се посочува дека Новаци за првпат се споменува во далечната 1468 година, како нахија со ограничени овластувања, и дека селото било регистрирано со името Новак, а е запишано како Новаки, Новак.
Богата историја имаат Новаци и мариовскиот крај, на чија територија се наоѓа голем дел од линијата на фронтот од Првата светска војна, долга дури 60 километри, места кои и денес сведочат за стравотните и ужасни битки со бројни жртви за што најмногу пишувале француските историчари Ив Жуен и Пјер Франсоа.
Негувањето на културно историското минато, развојот на меморијалниот туризам и зајакнувањето на цврстите врски со Франција, и посебно Долна Нормандија, се само една од задачите кои пред себе ги постави новоизбраниот градоначалник на општина Новаци Љубе Кузманоски, кој во ова интервју говори и за реалните проблеми на тамошната локална самоуправа.
Каква општина презедовте и како планирате да ја менаџирате во својот мандат?
– Кадровски општината ја затекнaв со 26 вработени на неопределено време и осум лица ангажирани преку Агенција за привремени вработувања. Просторното опкружување за сите врабoтени овозможува солидни услови за работа и во тој дел немаме никакви проблеми за понатамошното работење. Што се однесува до финансискиот дел, на денот на преземањето на општината т.е. примопредавањето, како и секаде така и кај нас имаше обврски кон повеќе фирми што давале услуги за општината. Меѓутоа, имаше одредена сума на пари на сметката на општината и со приливот што го добиваме на нашата сметка можиме да ги менаџираме пристигнатите трошоци така да сметам дека и во иднина нема да имаме проблеми со финасиското работење.
Кои се реалните проблеми на општина Новаци како локалната самоуправа?
– Ние како локална самоуправа секојдневно сме во контакти со граѓани од населените места на наша територија. Сите тие на некој начин имаат по некој проблем, пред се, од инфраструктурен аспект. Има барања за поправка на улици, патчиња, улично осветлување и сл. На сите тие барања гледаме да одговориме позитивно во границите на нашите можности.
Општина Новаци според територијата на која се наоѓа е една од најголемите во државата. Што е тоа што треба да се смени за состојбите во општината да бидат подобрени?
– Општина Новаци со површина од 773 километри квадратни е една од најголемите општини во која наша грижа е населението што живее во 41 населено место. За сите населени места обезбедена е потребна инфраструктура, патишта, вода, улично осветлување, телефонска линија. За повеќе населени места како што се селата Добромири, Рибарци, Гермијан имаме изработени проекти за канализација и се трудиме што побрзо да обезбедиме средства за нивна изградба. Во текот на годината планираме да реализираме повеќе проекти, како што се доасфалтирање на патот Рапеш-Старавина, реконструкција на училиштата во селата Горно Агларци, Бач и Гермијан, реконструкција на објекти на месни заедници Живојно, Далбеговци, Скочивир и други, доизградба на капела во селото Новаци, изградба на ракометно игралиште во с.Долно Агларци, реконструкција на водоводите во селата Мегленци и Старавина, и други проекти.
Во 2018 година ќе продолжи и соработката со општина Коломбел од Франција и АЛДА на тема Прва светска војна. Оваа година се навршуваат 100 години од завршувањето на оваа голема војна па општина Новаци ќе биде организатор, но, и во соработка со партнерите ќе биде вклучена на многу настани на оваа тема. Планираме на наша територија да поставиме спомен плоча со имињата на загинатите војници од Прва светска војна, нешто слично како споменикот во Коломбел, што беше поставен мината година во номеври.
Што издвоивте за да биде приоритетно во вашата работа како новоизбран градоначалник?
– Како нов градоначалник ќе се трудам општината да биди сервис на граѓаните, што е можно повеќе да ги решавам нивните проблеми. Еден од предусловите за успешно извршување на работните задачи е почитување на хиерархиската поставеност на вработените за што посебно обрнав внимание уште од почетокот на моето доаѓање за градоначалник. Се надевам дека по завршување на мандатот јас, советниците и вработените во општината ќе има со што да се пофалиме со сработеното.
Марјан Танушевски
Извор: МИА