Политичкиот лидер на Хамас, Исмаил Ханије, е убиен во Техеран, објави иранскиот државен медиум „Прес ТВ“ повикувајќи се на информации од Иранската револуционерна гарда (ИРГЦ).
Од Хамас во објава на нивниот канал на Телеграм велат дека Ханије е убиен заедно со неговиот телохранител во, како што наведуваат, израелски напад врз неговата резиденција по присуството на инаугурацијата на иранскиот претседател Масуд Пезешкијан на 30 јули.
Иранскиот врховен верски лидер, ајатолахот Али Хамнеи, денеска вети дека ќе му се одмазди на Израел за убиството на лидерот на Хамас, Исмаил Ханија.
Хамнеи рече дека Израел треба да се подготви за „строга казна“ бидејќи лидерот на Хамас беше убиен во израелски воздушен напад врз неговата резиденција во Техеран рано утринава.
„Сметаме дека е наша должност да го одмаздиме Ханија, кој беше драг гостин во нашата земја“, рече Хамнеи во изјавата на неговата веб-страница.
Иранскиот претседател Масуд Пазешкијан претходно денеска, исто така, го осуди убиството на Ханија и рече дека Иран ќе го брани својот територијален интегритет.
Убиството на највисокиот политички лидер на Хамас може да има далекусежни последици. Убиството на Ханија во Техеран може да предизвика директна иранска одмазда против Израел, а Хамас може да се повлече од преговорите за прекин на огнот и договор за ослободување на заложниците, за кои американските посредници рекоа дека е постигнат напредок.
Израел од јули 1996 година уби четворица лидери на Хамас, вклучувајќи го и шеикот Ахмед Јасин, со кого политичкиот лидер Исмаил Ханије, кој беше убиен во Техеран, тесно соработуваше откако се приклучи на палестинската група.
Во јануари 1996 година, Израел го уби воениот водач на Хамас Јахја Ајаш во Беит Лахија, Газа, пренесува Ал Џезира. Во март и април 2004 година, во Газа беа убиени духовниот водач и основач на Хамас, шеикот Ахмед Јасин и наследникот на Јасин и ко-основач на Хамас, Абдел Азиз ал-Рантиси.
Високиот функционер на Хамас, Салех ал-Арури, беше убиен во напад на израелско беспилотно летало во Бејрут во јануари оваа година. Хамас тврди дека Ханије бил убиен во израелски воздушен напад во Техеран, додека Израел не коментирал, што често се случува кога станува збор за атентати извршени од израелската разузнавачка агенција Мосад.
Иранската револуционерна гарда утринава соопшти дека Ханије и неговиот телохранител биле убиени во Техеран, каде лидерот на Хамас присуствувал на инаугурацијата на иранскиот претседател Масуд Пезешкијан. Хамас го нарече „сериозна ескалација“ убиството во наводниот воздушен напад и се закани со „војна за ослободување на Ерусалим“.
