Љубомир Костовски
Слушам во дневната соба како ечат пукотници, како луѓе запомагаат и повикуваат сите да се засолнат а притоа пукотниците не престануваат…
Но не гледал никој дома некој акционен филм, не било тоа некој вестерн за минатото на Тексас. Таа слика и прилика на пукотници, две групи среде пладне на 24 јуни во населбата Ченто водат улична војна!
За ова нема сериозен извештај и се чини официјалната власт сакала да го сокрие овој настан – па премногу е насилства за еден-два мeсеци само во оваа општина (Гази Баба), дури и во оваа населба. Имавме тешко ранување со нож на ученик од осмо одделение, нели, во училишниот двор.
А на вчерашната дебата, по интерпелацијата за министерот за внатрешни, од негова уста чув дека македонскиот народ никогаш не бил побезбеден!
Имаш ли релевантна анкета за тоа? Па само твоето МВР, министре, дневно дава по дузина извештаи за случени настани кои не се наивни. Па и немало толку извештаи како порано, од 1945 година наваму. Или твоите службеници „се описмениле“, па бележат ли, бележат.
Се сеќавам дека само неколку месеци по седнувањето во фотелјата на овој министер се случија мислам шест убиства кои останаа неразјаснети! Едно од нив беше за лекар од Амбулантата Железара. Има две години, нели, од тогаш.
Па кога станува збор за тие пресметки со голем број учесници и испукани куршуми, еден таков настан имаше и пред зградата на полициската станица Бит пазар и тоа пак среде пладне и додека многу дечиња се играле на улицата. Ги пуштиле родителите, па тука е најбезбедно, нели? Било ептен жестоко, а имаше и еден убиен рок музичар во своето возило („сачекуша“). И деновиве дознаваме дека убиецот (или убијците) се ослободени од обвиненијата – немало релевантни сведоци! Па кај и да има кога сите полицајци изгледале легнувале под маса….
Да не одиме во детали и да не го споменуваме Кочани.
Текстот е личен став на авторот | ЦИВИЛ МЕДИА
Во ера на дезинформации, националистички популизам и авторитаризам, неопходна е вашата поддршка за ЦИВИЛ
Поддржете ги независните медиумски платформи на ЦИВИЛ во борбата против дезинформациите, национализмот, хибридните закани и авторитаризмот
Дајте го својот придонес СЕГА
