„Улаф сте?“ е насловот на првата професионална претстава на македонски знаковен јазик за возрасни лица со оштетен слух и на говорен македонски јазик за љубителите на театарската уметност. Претставата ги обработува проблемите на младите и фактот дека населението се иселува од државата. Авто-цензура која е присутна од стравот да се кажат јасно и гласно општествените проблеми. Приказната се раскажува низ призма на глувонемата заедница, во која актерите во име на глувите лица без цензура ги раскажуваат сите општествени неправди кон оваа ранлива група.
„Пред година и пол неколку глуви возрасни лица во Охрид после гостувањето на детската претстава ТРИ на знаковен јазик – ме замолија да направам претстава на знаковен јазик за возрасни, бидејќи никогаш не гледале театар на нивниот мајчин јазик. (Знаковен јазик). Хуманизмот и емпатичноста не се само добри карактеристики на човештвото, тие се претворија во моја лична мисија“, изјави режисерот Јован Ристовски.
Претставата освен глуви лица можат да ја гледаат и останатата публика и за прв пат да уживаат во една сосема поинаква театарска сензација. Костимограф е Марта Дојчиновска, сценограф Стефан Малбашиќ, драматург Билјана Крајчевска / Весна Куслеска, толкувач на знаковен јазик Катерина Шаркоска, асс. Елизабета Георгиева.
Играат: Наталија Ристеска, Кристијан Танчевски, Марија Стефановска, Маја Андоновска Илијевски, Сандра Грибовска, Никола Пројчевски. Соработник за знаковен јазик Мартин Ангелов.
Премиерата на претставата беше на 16 јуни во Центарот за култура – Битола.
Продукцијата на претставата е на ATO.
Извор: Тера
