Уставниот суд со укинувањето на мораториумиот за градби во Општина Центар, создала општ хаос во општината, бидејќи не е важечки и оној од 2014 година, практично тој дел од општината сега е без детален план.
Со овој ДУП Ј07 се опфатени локалитетите Капиштец, Завод за медицинска рехабилитација, Старо Водно, Долно Водно, Мало Курило, Цвеќара, со што тој дел од општината сега е без детален план.
Градоначалникот Горан Герасимовски за ЦИВИЛ Медиа изјави дека веќе започнале консултативни средби со сите засегнати страни и институции за да видат што понатаму. Воедно, оствариле средба и со претседателот на парламентот за да побараме толкување. Освен тоа, со Министерството за транспорт и врски се подготвуваат и официјално да достават до Парламентот за тоа како да се толкува одлуката на Уставниот суд, бидејќи, како што вели Герасимовски, не знаат на кој член од законот да се повикаат.
Герасимовски во теливизиско гостување изјави дека со оваа одлука на Уставниот суд се отворил голем проблем за Општина Центар.
-Ова е најголем ДУП можеби и во државава. За сега не можеме да постапуваме се додека не добиеме одговор околу толкувањето. Има пристигнато голем број на предмети. Инвеститорите зеле кредит, направиле идејно решение, а не можат ништо да реализираат – истакна Герасимовски.
Од Уставниот суд претходно посочија дека оние граѓани и инвеститори што досега успеале да ги обезбедат сите потребни документи од Општина Центар и почнале или завршиле со градежните активности на наведените локации, меѓу кои се и атрактивните парцели на Водно, не се засегнати од оваа одлука бидејќи станува збор за укинување, а не за поништување на Деталниот урбанистички план. Од друга страна, пак, оние инвеститори што имаат интереси во оваа градска четврт и купиле плацови со намера да градат, но досега не ја обезбедиле потребната документација од Општината, согласно оваа одлука на Уставниот суд, нема да можат да го направат тоа кога одлуката на Судот ќе стапи во сила, односно со нејзино објавување во „Службен весник“
По осум години, актуелниот состав на Уставен одлучи да поведе постапка и на 25.01.2023 година ја укина Одлуката со која на 18 јули 2014-та година Советот на Општина Центар го донесе Детален урбанистички план Градска четврт Ј 07 со локалитети Капиштец, Завод за медицинска рехабилитација, Старо Водно, Долно Водно, Мало Курило, Цвеќара, а дел од овој ДУП во јавноста е познат и како „Плацовите на Водно“, во кој поранешниот премиер Никола Груевски беше првостепено осуден во отсуство на седум години затвор поради перење пари и противправно стекнување имот.
Покрај него, затворски казни добија и неколкумина други, меѓу кои и неговиот поранешен кум Ристо Новачевски и ексдиректорот на поранешната Управа за безбедност и контраразузнавање Сашо Мијалков.
Инаку, носењето на сега веќе укинатиот ДУП беше едно подраматичните поглавја во работата на Советот на Општина Центар откако СДСМ на локалните избори во 2013 година, по неколку прегласувања, ја презеде власта во Центар, а Андреј Жерновски стана нејзин градоначалник.
Тесното мнозинство во Советот од 12 советници на СДСМ наспроти 11 на ВМРО-ДПМНЕ првично го спречуваше носењето на урбанистичките решенија, потсетува „Призма“, но откако претседателот на Советот Мирослав Шиповиќ беше уапсен, па пуштен во 2014 година, неговото однесување се смени. Додека другите советници од СДСМ не учествуваа на расправата за овој и за други ДУП, тој присуствуваше и гласаше против. Со тоа обезбедуваше мнозинство за Советот да може да работи, а резултатот од 11 гласа наспроти 1 беше толкуван како одлука за усвојување на планот.
Инаку, ДУП Ј07 подолго време е актуелен во јавноста поради обидите за градежен упад во шумата на Водно, за кои јавноста слушна и во „бомбите” на СДСМ.
Актуелниот градоначалникот на Општина Центар, Горан Герасимовски, во јуни годинава соопшти дека се стопираат сите градежни дејствија за овој план, кој ги опфаќа и атрактивните парцели на Водно до кои нема пристапен пат, а за кои жителите од тој дел на населбата долго време реагираат на обиди за градежен упад во шумата.
Н. А.
