Италија вчера даде согласност за плановите на Ватикан да претвори парцела од околу 430 хектари северно од Рим, извор на несогласувања во минатото, во масивна соларна фарма.
Светата Столица се надева дека таму ќе генерира доволно електрична енергија за да ги задоволи своите потреби и ќе го направи Ватикан првата јаглеродно неутрална земја во светот.
Спогодбата предвидува дека развојот на парцелата Санта Марија Галерија ќе ја зачува земјоделската употреба на земјиштето и ќе го минимизира влијанието врз животната средина во областа, се вели во соопштението на Ватикан.
Не се дадени дополнителни детали. Светата Столица ќе биде ослободена од плаќање даноци на Италија за увоз на соларни панели за соларна фарма, но нема да има корист од финансиските стимулации што ги уживаат Италијанците кога ќе преминат на сончева енергија.
Од своја страна, Италија би можела да има корист од соларна фарма во Ватикан бидејќи се смета за исполнување на целите на ЕУ за чиста енергија. Вишокот електрична енергија произведена од соларната фарма, која ги надминува потребите на Ватикан, ќе биде обезбедена за локалната заедница, соопштија претставници на Светата столица, пренесе МИА.
