пишува: ДИМИТРИЈЕ БУЖАРОВСКИ
Ова со јубилеите на Охридско лето, што се слават година дена порано (?!) ме потсетува на броењето на татко ми на родендените – сега наполни 59 години ама влезе во 60-тата.
Охридско лето оди натаму, на денот на полнењето 58 години сечеа торта со 59 години. Гарантирам дека годинава се спремаат да слават 60 години и да сечат торта со 60 години, иако оваа година на 4 август фестивалот ќе наполни 59 години.
Дури и на сајтот на фестивалот стои дека тој започнува со концертот на Ана Липша Тофовиќ на 4 август 1961 година. Според тоа фестивалот може да сече торта за 60 години исклучиво на 4 август 2021 година. Ама изгледа дека никој дури ни во Охридско лето не го чита сајтот.
Инаку, познавајќи го Пјер, сопругот на Ана, кој 5 минути зборуваше за неврохирургија (како неврохирург беше познат и ценет на целиот Балкан), 15 минути за музика и 30 минути за Ана (ова не е моја мисла, туку на Владо Чучков), можам да претпоставам чија беше идејата и организацијата на целиот настан. Но еден концерт сигурно не е фестивал. До правиот фестивал ќе поминат повеќе години, ама нашата пуста желба да покажеме што поголеми и подалечни корени; ајде ќе го прифатиме датумот.
Веселата математика со годините и јубилеите ќе започне со монографиите: првата Дваесет години фестивал Охридско лето: 1961–1980 итн., до последната: 50 години Охридско лето објавена во 2010 година.
Ај да претпоставиме дека фестивалот во таа година бил завршен (значи 50-тото по ред Охридско лето било одржано), па монографијата е работена по завршувањето на ова лето, иако имајќи ги предвид тортите, и обемната работа врз подготовката на текстот, личи дека и монографиите се работени однапред. Ама да се слави јубилејот во таа година и да се сечат роденденски торти во погрешни години!? Тоа е како на детето да му славиме прв роденден кога ќе се роди, а втор кога ќе наполни една година.
Јас не познавам ниту една институција ниту во светот ниту во Македонија, која си пресметува родендени на ваков начин.
Ќе го наведам примерот со Википедија во која годините на старост дури и на еден ден пред роденденот додека не се стигне до него, се пресметуваат според претходната година, (на пример ако е 3 август, а роденденот на некој е на 4 август и роден е условно во 1961 година, на 3 август 2020 година ќе стои дека има 59 години, и дури по 4 август 2021 година возраста ќе биде променета на 60 години).
Ова навистина е беспредметна дискусија, и толку е апсурдно – просто да не веруваш. Охридско лето додека не стигне до 4 август 2021 година не може да разговара за никаков јубилеј. Во некои случаи може да биде јубилејна годината во која се паѓа роденденот (на пример 2021 година за Охридско лето), или да се прогласи јубилејна од почетокот на датумот на исполнување на јубилејот до следната година (според ова јубилејот на Охридско лето би траел од 4 август 2021 година, до 3 август 2022 година). Ова уште повеќе се однесува на изработка на монографии, кои може најрано да се појават на вистинскиот роденден, а не на специјалитетот на Охридско лето – славење година дена однапред; инаку очигледно ќе ги прескокнат настаните што ќе се случат до денот на роденденот.
Не можев никаде на страницата на Министерството за култура да ги најдам резултати од годишнитe конкурси за финансирање проекти од национален интерес во културата за 2020 година за националните установи. Кај дополнителни резултати стои само:
За проектите што ќе бидат содржани во годишните програми за работа на националните установи, министерот за култура донесе решенија (?!!!)… Во тие решенија, ама гарант, на невидено, има предвидено богата програма за одбележување на 60-годишнината со издавање на монографија.
Сите права се задржани. Услови за користење, авторски права и заштита на приватноста.