На вчерашниот натпревар на НБА во Лондон во О2 Арената, кошаркарски навивач јасно ги искажа своите чувства за контроверзните планови на Доналд Трамп за преземање на Гренланд од Данска извикувајќи „оставете го Гренланд на мир“ додека се пееше американската химна пред почетокот на натпреварот, пренесува британски Телеграф.
Извикот беше дочекана со овации и аплауз од публиката во О2 Арената, додека пејачката и актерка Ванеса Вилијамс продолжи да ја пее „Ѕвезденото знаме“ пред натпреварот помеѓу Орландо Меџик и Мемфис Гризлис.
Инцидентот се случува во услови на зголемени тензии меѓу Обединетото Кралство и САД околу плановите на Доналд Трамп да го преземе Гренланд.
Претседателот на САД вели дека сака да го преземе Гренланд од Данска за националната безбедност на неговата земја и се закани дека ќе воведе царини за земјите кои му се спротивставуваат. Велика Британија, заедно со седум други сојузници во НАТО, издаде соопштение во кое изразува солидарност со Данска и го обвини Трамп за „поткопување на трансатлантските односи“.
Како што пренесува Тајм, осврнувајќи се на прашањето како „многу сериозна ситуација“, британскиот премиер Стармер, отфрлајќи ја, барем засега идејата за одмазднички царини против САД, рече дека „трговската војна не е во ничиј интерес“ и нагласи дека негов приоритет е да дејствува во национален интерес на Обединетото Кралство.
Велика Британија е подготвена да им помогне на сојузниците на НАТО на тој фронт, вети Стармер, пред да изјави дека никаков план не може да се донесе без вклучување на Гренланд и Данска.
„Секоја одлука за идниот статус на Гренланд им припаѓа само на народот на Гренланд и на Кралството Данска. Тоа право е фундаментално и ние ќе го поддржиме“, рече Стармер, заземајќи јасен став против реториката на Трамп, која вклучува одбивање на Белата куќа да ја исклучи можноста за преземање на Гренланд со воена сила.
Д. Мишев
