Денес е 19 ноември две илјади дваесет и четврта година. На 24 февруари 2022 година, Руската Федерација започна воена агресија од големи размери насочена кон уништување на Украина и Украинците. 1000 дена Украинците херојски се борат против руските агресори, кои се водени од идејата за уништување на украинската државност и нарушување на безбедноста во Европа, нагласува украинската амбасадорка во земјава, Лариса Дир видеото објавено на социјалните мрежи во кое зборува на македонски јазик.
Како што нагласува амбасадорката, за време на целиот овој период, руските трупи вршат брутални воени злосторства, злосторства против човештвото, депортација и насилно преселување на украински деца во рф, ја уништуваат критичната инфраструктура на Украина. Зверствата на руските војници во Буча, Ирпин, Мариупол, секојдневните бомбардирања на цивилното население, стрелањето и мачењето на воените заробеници, незаконската депортација на украински деца – сето ова се злосторства на русите.
Според Дир, Планот за победа на претседателот Володимир Зеленски има многу јасни компоненти: членство на Украина во НАТО, незапирливо зајакнување на нејзината одбрана и мерки на одвраќање на украинска територија кои ќе го принудат рускиот агресор да постигне праведен мир.
Многу ја цениме поддршката на Северна Македонија како членка на НАТО. 1000 дена Украинците ја држат линијата на одбрана. 1000 дена украинската армија ја штити Украина и Европа. Украина е актива за НАТО, вели Дир.
На крајот од видео обраќањето, украинската амбасадорка потенцира дека овие илјада дена се часови и минути на титанска борба и напор, храброст и херојство. Тоа е смелоста и издржливоста на Украинците, зајакнати со воена и финансиска поддршка од партнерите. Украина им е благодарна на сите што ѝ помагаат да се бори. Ние нема да се покориме. Слава на Украина!
М. Д.
