#ТрчањетоЌеТеПромени е хаштаг и слоган на Скопскиот маратон кој започна утрово во 8:30 часот. Овој маратон се одржува по 16-ти пат. И оваа година, главен организатор е Виз-Ер. Трката се одржува со строго придржување кон протоколите за заштита од коронавирусот. Првата награда од овој натпревар е 2.000 евра и вредносен ваучер од Виз Ер од 350 евра.
Наместо на 10 мај годинава, маратонот се одржува денеска, како што објавија и организаторите: „Заради влошувањето на ситуацијата со Корона вирусот, COVID-19, како нај нас така и во светот, и заради почитување на мерките кои ги превзема нашата Влада заедно со институциите и препораките од Светската здравствена организација, Сојузот на спортови на Скопје како организатор на Виз Ер Скопскиот маратон кој беше планиран за 10 мај 2020, донесе одлука трката да се одложи за 4 октомври 2020 година“.
Од веб страницата на Скопскиот маратон дознаваме дека под покровителство на Виз Ер, оваа година стана партнер со Abbott World Marathon Majors како една од квалификационите трки за следната серија. Со ова Виз Ер Скопски Маратон 2020 станува квалификациска трка за Светското Првенство во маратон за старосни категории во 2021!
Abbott WMM е серијал од шестте најголеми маратони во светот познат како Големата шестка, во која се вбројуваат Бостонски, Лондонски, Токиски, Берлински, Чикашки и Њујоршки маратон. AbbottWMM е Светско првенство во нивна организација кое ќе се одржи во 2021 година, а локацијата каде ќе се одржи ќе биде објавена дополнително следната година.
За да може некој тркач според старосна категорија да биде дел од ова Светско првенство, мора да исполни одредени услови/норми за да влезе во ранг листата на квалифицирани учесници (AbbottWMM Wanda Age Group World Rankings). За еден тркач да се најде на оваа листа, треба да има учество на две трки од листата на квалификациони трки, во кои од следната 2020 година влегува и Виз Ер Скопски Маратон, заедно со повеќе од 100 други трки низ светот.
фотографии: Вања Крстев
