Демократската фракција на ВМРО-ДПМНЕ во првичната Декларација велат дека во остварување на својата визија, мисија и цели ќе се посветат на јавно промовирање на фракционерските ставови, анализи, ставови и размисли, организирање предавања, дебати и конференции со определени целни партиски и други групи од затворен и отворен карактер, промовирање на култура на партиципативност и мотивирање за учество во политички процеси, промовирање на концептите на критичко мислење, дебатирање со цел демократизација и развој на социо–културните политики, како и формирање Центар за развој на политичка култура, слободна мисла и партиципативна демократија.
Визија на Демократската фракција на ВМРО-ДПМНЕ
Визијата на Демократската фракција на ВМРО-ДПМНЕ е исклучиво посветена во насока на зајакнување на внатрепартиската демократија преку збогатување и динамика на внатрепартискиот живот, кој треба да придонесе за демократизација и релаксација на внатрепартиските односи и корелации и во создавање на услови за демократски процедури и постапки при донесување на партиски одлуки и ставови…
Мисија на Демократската фракцијата на ВМРО-ДПМНЕ
Мисијата на Демократската фракцијата на ВМРО-ДПМНЕ е обезбедување можност за организирано и јавно да се истакне и искаже поинаков став, несогласност како и незадоволство од оној на партиското раководство, без притоа да се изрекуваат или очекуваат партиски санкции.
Фракцијата ќе се залага за секое клучно прашање или проблем во партијата и државата (во случај на постоење на различни внатрепартиски видувања и ставови), да се отвори дискусија помеѓу партиското членство при што усвоениот мнозински партиски став да биде доследно почитуван од сите членови на партијата.
Цели на Демократската фракцијата на ВМРО-ДПМНЕ
- Дејствувањето на партијата да се заснова на темелни демократски принципи и вредности: партиска слобода, меѓусебна солидарност и обезбедување на еднакви услови и еднаков пристап на секој член до секоја партиска и државна позиција и функција,
- ВМРО ДПМНЕ мора да го оправда својот префикс (додавка) и да стане обединувачка партија на сите прогресивни сили, наместо досегашната политика ,, раздели па владеј”.
- Да изградиме систем на имунитет, но и да ги победиме на секое поле ретроградните и мрачни партиско – политички сили, за да се спасиме од неизбежната катастрофа што ни се заканува.
- Да ставиме крај на манипулативното партиско владеење и управување. Наместо лагата, на пиедестал да ја ставиме вистината и вербата во поубава иднина, а манипулативното да го замениме со чесно владеење и управување
- Стимулација и развивање на демократска свест и партиципативна политичка култура – ВМРО ДПМНЕ да стане партија каде секој политички конфликт или било какво друго недоразбирање ќе се модерира според начелата на демократијата, дијалогот, толеранцијата и постигнување консензус помеѓу клучните партиски фактори за најзначајните прашања.
- Фракцијата да стане доверлив и вистински „коректив“ на сите недемократски, незаконски, нестатутарни и неетички партиски и политичко-општествени случувања и дејствувања,
- Донесените партиски одлуки да добијат и на ,,тежина” односно на квалитет и да бидат широко прифатени и практикувани од членството,
- Да се детектираат сите сериозни критички точки во функционирањето на партијата и државата, и притоа да се понудат конкретни решенија за актуелните проблеми и состојби
Принципи на дејствување
- Широк и демократски избор на носители н партиски функции на сите нивоа, исклучиво избрани од членството – почнувајќи од лидерот на партијата, па до сите останати партиски функции на сите нивоа на организираност на партијата.
- Практикување на реална кадровска(партиска и државна) политика заснована врз вредносни постулати: стручност; одговорност; отчетност, правичност и интегритет на личноста.
- Интегритет на партиските органи и тела кои не смеат да бидат подложни на притисоци и манипулации од каков било вид, елиминација на досегашната фамилијарност, партиски и лични анимозитети во секојдневното извршување на доверените и договорените задачи и обврски.
- Легалитет и легитимитет на донесените партиски одлуки и ставови – одлуките мора да бидат донесени во легитимна и легална постапка согласно уставните, законските и статутарните одредби.
- Нова реална економска политика – Демократската фракција на ВМРО-ДПМНЕ предлага нов економски концепт на забрзан економски развој, заснован врз концентрирано знаење и оптимална употреба на материјалните ресурси, наспроти секојдневното задолжување и шминкање на неодржливиот економски систем на продажба на евтина работна сила и распродажбата на националните ресурси и интереси; како и запирање на трендот во економијата кој произведува екстремно богато и политички заштитено бизнис малцинство и сиромашно мнозинство.
- Максимална партиска демократија – воспоставување на вистинскиот и реален партиски плурализам на размисли, ставови и идеи.
- Прочистување на партијата од криминалните и аморални структури и од ловците по функции,
- Морал во политиката – политиката не смее и понатаму да се поистоветува со најстариот занает на светот, туку како професија заснована на морални принципи, вредности и доблести.
- Воведување на принцип на заслуги и награди за вложен труд, лојалност и посветеност кон извршување на партиските задачи – главен принцип на партиско-политичко кариерно напредување
- Транспарентност при креирање на клучните ставови за водењето на надворешната и внатрешната политика и во борбата за основните национални и државни интереси во меѓународните односи – воспоставување на транспарентен партиски демократски модел на надворешна политика, со демократска контрола и отчет, а на надворешен план, насочен кон заштита на виталните државни и национални интереси на Република Македонија. Заштитата на виталните интереси, пред сé, подразбира користење на сите политички и правни средства за воспоставување целосен меѓународно – правен субјективитет на уставното име на Република Македонија во Обединетите Нации, исправање на досегашната нанесена неправда со барањето за промена на името, вклучувајќи ја и борбата за дипломатското признавање на уставното име Република Македонија од сите членки на Обединетите нации. Поради недемократското и нетранспарентно донесување одлуки во тесен круг на едномисленици во претходниот период, беше запоставена борбата за стратешките надворешно–политички цели и не беа употребени сите можни дозволени средства и инструменти за реализацијата на автентичните национални интереси на Република Македонија на меѓународен план.
- Вистински вредности на вистинско место – Демократската фракција ќе го ревидира досегашниот негативен и флегматичен однос на партиското раководство кон сите творечки и интелектуални потенцијали на партијата, особено кон младите и специјализирани кадри кои масовно ја напуштаат државата. Максимална заложба за валоризација на реалните човекови, правни, морални и други вредности и квалитет за да си го најдат своето вистинско место како во партијата така во државата.
ЦМ
