Тестенините поевтинуваат за 15 отсто, а млечните производи за 10 проценти и нивните цени ќе се замрзнат, соопштија на заедничката прес-конференција премиерот Димитар Ковачевски и министерот за економија Крешник Бектеши.
Со одлуката цената на тестенините ќе се намали за 8-9 денари, односно минимум за 15 отсто, а за овие продукти се укинуваат и увозните царински давачки од 13 март до 31 мај 2023 година.
Намалување на цените од најмалку 10 отсто ќе има и за млечните производи, а одлуката ќе биде во сила од 17 март до 31 мај 2023 година и се однесува на трајно кравјо млеко со 2,8, 3,2 и 3,5 отсто масленост, урда, кравјо и мешано бело сирење, кравји кашкавал, кисело млеко, павлака и јогурт.
-Се намалува продажната цена на тестенини, макарони и шпагети, за 15 отсто или во просек за осум до девет денари. Се укинуваат и царинските давачки за увоз на овие продукти од 13 март до 31 мај 2023 година. Се замрзнуваат и цените на млечните производи: трајно кравјо млеко 2,8, 3,2 и 3,5 отсто, урда, кравјо и мешано бело сирење, кравји кашкавал, кисело млеко, павлака и јогурт. Цените се намалуваат за десет отсто, а одлуката важи од 17 март – 31 мај 2023 година, рече Ковачевски.
Ковачевски истакна дека Владата ќе проодлжи да носи одлуки кои го штитат интерсот и стандардот на граѓаните.
„Очекуваме целосна поддршка од стопанствениците и солидарност се со цел цената да не биде на грб на граѓаните и на потрошувачите“, рече министерот Бектеши.
Ова е втора одлука за замрзнување цени на прехранбени производи, откако на 28 февруари годинава стапи во сила ограничувањето на цената на белиот и полубелиот леб на 33 денари.
М. Д.
