Владата на Република Македонија излезе со соопштение до јавноста по реакцијата на дел од граѓанските организации кои повикаа на политичка одговорност одделни институции и носители на високи јавни функции, за бегството на осудениот Никола Груевски.
Во соопштението на Владата на Република Македонија се потенцира дека истрагата што ја води Јавното обвинителство мора да заврши пред да се објавуваат детали во јавноста, особено заради тоа што се работи за деликатни истражни дејствија за кои постојат индиции дека инволвираат граѓани на трети земји, и дека Владата, заедно со МВР, се одлучни дека ќе ги почитуваат законите и дека нема да дозволат извршната власт да ја нарушува истрагата која ја води Јавното обвинителство, што беше редовна пракса во минатото.
Понатаму во реакцијата од Владате се вели – „ Министерството за внатрешни работи, по налог и супервизија на министерот Оливер Спасовски, со сите свои ресурси и професионални капацитети учествува во асистирање на истрагата за утврдување на начинот на кој осуденото лице Никола Груевски ја напуштило територијата на Република Македонија“.
„Владата на Република Македонија ги уверува јавноста и граѓанските организации дека максимално ја поддржува независната и професионална истражна постапка, дека ќе ги прифати сите докажани резултати на истрагата, и дека ќе поддржи преземање одговорност и правосудна со која пред лицето на правдата ќе бидат изнесени сите личности кои учествувале или го помагале бегството на осудениот, поранешен премиер Груевски.“
Од Владата појаснуваат дека, во согласност со надлежностите и процедурите, со реконструкцијата на бегството и укажувањата на помагателите, базирани на основани сомневања, поткрепени со докази, прво треба да излезе Јавното обвинителство, и уверуваат дека откако истрагата ќе се заокружи и комплетира со докажани и потврдени дејствија, соодветно ќе ја информираат јавноста во земјата.
Д.Т.
