На несанкциониран фестивал на улична уметност во градот Екатиринбург на почеток на годината, уличниот уметник Филип Козлов – познат Филипензо – нацрта графити – слики на балерини кои танцуваат на Лебедово Езеро, алузија на балетот кој беше емитуван за време на пучот против советскиот лидер Михаил Горбачов во август 1991 година.
“Веќе 20 години чекаме со надеж за балетот“, беше наведено во субверзивниот наслов, со јасно упатување на двете децении владеење на Путин.
На 9 август, 1999 година, руската историја се промени засекогаш. Тогашниот претседател Борис Елцин го именува Владимир Путин, неговиот поранешен шеф на домашната разузнавачка служба, за вршител на должноста премиер.
Се чинеше дека ќе се работи за назначување со краток век. Претходникот на Путин само неколку месеци остана на работа, а Елцин беше сведок на тројца други премиери како доаѓаат и си заминуваат по финансискиот колапс во август 1998 година.
Во тоа време, Путин не поседуваше ниту една аура на светски лидер. Пред да влезе во администрацијата на Елцин, тој имаше голема кариера зад сцената, како советник на градоначалникот на Санкт Петербург, Анатолиј Собчак. Тој потоа се пресели во Москва за да работи за Секторот за управување со имотот на Претседателот, што претставува неверојатна отскочна даска за државна работа.
Но, за помалку од шест месеци откако беше назначен за премиер, Елцин неочекувано му го предаде претседателството на Путин на новогодишната ноќ во 1999 година. Тоа историско изненадување го стави во движење подемот на Путин до неспорен лидер на Русија.
Еден фактор беше јасен: мускулниот одговор на Путин кон домашниот тероризам. Во септември 1999 година, низа мистериозни бомбашки напади на станови однесоа стотици животи во неколку градови низ Русија и ја парализираа земјата од страв.
Руските истражувачи заклучија дека нападите биле извршени од страна на исламски екстремисти. Но, противниците на Путин – најпознатиот, прогонет тајкун Борис Березовски и поранешниот руски шпион Александар Литвиненко – продолжија да ја промовираат темната теорија на заговор дека руските безбедносни служби биле вмешани во монтирањето на бомбашките напади на становите, како провокација чија цел била да изнудат воена акција во Чеченија .
Березовски беше пронајден мртов во неговиот замок надвор од градот во Велика Британија во 2013 година, очигледно самоубиство. Литвиненко почина откако беше отруен од полониум-210 во Лондон, убиство за кое истрагата во Велика Британија заклучи дека најверојатно било режирано од Путин.
Машината за создавање митови ќе работи неуморно во текот на следните две децении за да се рафинира тој имиџ на Путин како човек од акција.
Воената кампања во 1999 година во Чеченија, исто така, го создаде и образецот за начинот на војување на Путин. Руските сили го израмнија бунтовничкиот главен град Грозни. Сликите од разрушениот град би изгледале неверојатно слични на опколените сириски градови како Алепо, кои би биле под интензивно бомбардирање од страна на руските воени авиони, откако Путин започна воена интервенција таму во 2015 година.
Анексијата на Крим имаше своја цена: Русија беше погодена од економски санкции од страна на САД и нејзините сојузници. Овие санкции удрија по џебовите на обичните Руси, но малку влијаеше на престижот на Путин. Путин, исто така, се држеше до политика на строга фискална дисциплина: На почетокот на ова лето, руската Централна Банка потврди дека девизните резерви достигнале 500 милијарди американски долари.
Руските државни медиуми малку имаат сторено за да ги одбележат двете децении владеење на Путин. Но, по 20 години на власт, некои пукнатини почнуваат да се покажуваат во неговата фасада како лидер.
Фактот дека јасен наследник за Путин се нема појавено е првото нешто што и паѓа на памет на политичката класа на Русија. Според законот, Путин мора да се повлече откако ќе му заврши неговиот следен мандат во 2024 година.
Но, многу набљудувачи шпекулираат дека Путин може да изнајде начин да се задржи на должноста, слично како претседателот Кси Јинпинг од Кина, или како поранешниот претседател на Казахстан, Нурсултан Назарбаев, кој формално се повлече, но кој сè уште држи формални лостови на моќ.
Подготви: Б. Јордановска
Со преземање на било која содржина објавена на ЦИВИЛ Медиа, спротивно на Условите, се согласувате на ЦИВИЛ да му исплатите надоместок од 25.000 денари во рок од осум дена по преземањето на содржината. Оваа обврска не застарува, а за секое доцнење на исплатата ќе биде пресметана соодветна законска камата.