ВМРО-ДПМНЕ денеска побара оставки од вицепремиерот задолжен за економски прашања Кочо Анѓушев и од директорот на Фондот за иновации, Јован Деспотовски во врска со грантот доделен од Фондот во висина од 160.000 евра за „Каст Инвест“. Тие ја обвини владејачката партија за нелегални тендери и донации, во време кое како што рече, целата јавност е фокусирана на прашањата околу името на Република Македонија, референдумот и договорот со Грција. СДСМ на тоа одговори дека „како одговорна партија отсекогаш се залага и ќе се залага за рамноправност, еднаквост и доследно почитување на правилата.“
„Никој не смее да биде фаворизиран, не смее да има судир на интереси, ниту пак расфрлање со народните пари, нешто што беше одлика на владеењеето на ВМРО-ДПМНЕ. Оттука, повикуваме да се проверат сите постапки и доколку се утврди каква била неправилност или конфликт на интереси, одлуките да бидат ревидирани и исправени.“ – се вели во соопштението на СДСМ.
„Пред една недела, вицепремиерот Кочо Анѓушев излезе на говорница и рече дека му било “чест и задоволство и голема радост” што фондот за иновации делел 10,5 милиони евра!. Па како нема да му биде кога на фирма во која што како сопственик тој фигурира негова компанија се доделуваат 160.000 евра”, рече портпаролот на ВМРО-ДПМНЕ, Арсовскии го повика Јавното обвинителство да поведе постапка против Анѓушев и Деспотовски во врска со грантот.
Во своето соопштение, владејачкиот СДСМ вели: „Наместо да шири измислици и лажни, неосновани обвинувања, додека во позадина бара амнестија за криминалите, ВМРО-ДПМНЕ да одговори како и на кој начин стана најбогата партија во Европа со имот вреден 60 милиони евра додека Македонија тонеше во долгови. ВМРО-ДПМНЕ, партијата што е симбол на криминал и корупција нема никаков кредибилитет да зборува за јавните набавки, бидејќи токму таа партија бесрамно делеше буџетски пари на партиски членови и послушници, меѓу кои и тендер од над еден милион евра на новинарка и уредничка на два медиума блиски до ВМРО-ДПМНЕ.“
СДСМ потсетува дека „јавноста многу добро знае како братучедот на Никола Груевски, Сашо Мијалков ја киднапираше целата македонска економија, како двоецот Јанакиески и Груевски договараа провизија од над 25 милиони евра за автопатите, како со милионски суми народни пари се поткупуваа и контролираа бројни медиуми.“
Наспроти тврдењето на ВМРО-ДПМНЕ дека Анѓушев фигурира како сопственик во фирма – допитник на грант од државниот Фонд за иновации, СДСМ тврди дека „неточни се шпекулациите на ВМРО-ДПМНЕ за вицепремиерот Кочо Ангушев. Вицепремиерот во целост го испочитува Законот за судир на интереси со стапување на функцијата и се откажа од управувачките функции во компаниите каде што има сопственост, во меѓувреме ја продаде компанијата ЕДС за да се избегне токму судирот на интереси, а целосно транспарентно го објави и анкетниот лист.“
СДСМ ги демантира сите тврдења на ВМРО-ДПМНЕ и соопштува дека оваа партија „шири лаги и за тендерот на Министерството за здравство. За конкретниот тендер се уште нема одлука и смешно е да се бара негово поништување, бидејќи тој се уште не е доделен.“ Тие го повикуваат ВМРО-ДПМНЕ да не крева паника несоновано. „Правилата важат подеднакво за сите, а доколку се утврди каква било неправилност или судир на интереси ќе следува ревизија на одлуките. Економските политики на Владата предводена од СДСМ даваат реални резултати и тоа го гледаат сите, освен ВМРО-ДПМНЕ којашто останува заробена во матрицата на криминал, корупција и расипништво.“ – се заклучува во соопштението на СДСМ, во одговор на обвиненијата од ВМРО-ДПМНЕ.
