ВМРО-ДПМНЕ најавува протест за денеска со почеток од 12 часот и 30 минути, кој ќе заврши пред Владата, а истиот поради пандемијата со корона ќе биде со автомобили.
„ВМРО-ДПМНЕ ги повикува граѓаните денес на сенароден протест, со почеток во 12:30 часот кој ќе заврши пред Владата на Македонија. Поради заразата со корона, протестот ќе биде со автомобили и во 12:30 часот ќе се тргне кон Владата од две локации, СЦ „Борис Трајковски“ во Општина Карпош и СЦ „Јане Сандански“ во Општина Аеродром“, стои во соопштението на партијата.
Од СДСМ велат дека доколку опозицијата се грижела за здравјето на граѓаните немаше да кочи заем за опремување на болниците, немаше да ги поттикнува граѓаните на непочитување на мерките за заштита, немаше да шири невистини дека нема доволно тестови и заштитна опрема за вирусот, кој според нив некогаш е смешен, а некогаш опасен, немаше да организира протести на масовно се кршат мерките за заштита.
„Барањето оставки и со соопштенија и со протести, само ја нагласува пустата желба на ДПМНЕ за гола власт, иако пред само четири месеци, граѓаните на демократски и безбедни избори ги оставија во опозиција. Граѓаните застанаа зад државотворната СДСМ, која со сите сили се бори со невидливиот непријател, која по 30 години тапкање во место и назадување, со своите храбри и мудри политики ја придвижи државата напред во полноправно членство на НАТО, пред вратите на ЕУ, со гарантиран идентитет и јазик, која работи на подобрување на животниот стандард на сите граѓани“, стои во соопштението на СДСМ.
