Од следната недела ќе стартува иницијативата на ВМРО-ДПМНЕ за собирање на граѓански потписи за укинување на Законот за попис, најави вечерва потпретседателот на ВМРО-ДПМНЕ и пратеник во Собранието на Република Северна Македонија, Александар Николоски.
Николоски, при гостувањето во емисијата „Што не е јасно“ на Алфа телевизија, кажа дека правната процедура е веќе започната, а овие денови ќе биде објавен датумот од кога ќе почнат да се собираат потписите за кои рокот е 30 дена. Минималната бројка, како што изјави тој, е 10.000 потписи меѓутоа тој очекува дека бројката на потписи ќе достигне 100.000.
Тој посочи дека земјава одамна е држава на проценти, а не држава на граѓани, како и дека постои политички договор за проценти помеѓу СДСМ и ДУИ, кој сам по себе, како што рече, е штетен, затоа што ќе предизвика нереални бројки и ќе ја однесе државата во погрешен правец.
– Има јасен политички договор за пописот, тој се гледа и е помеѓу СДСМ и ДУИ, за жал во Македонија пописот одамна не е статистичка операција туку е политичка операција, особено по Охридскиот рамковен договор, кога Македонија стана држава на проценти, а не држава на граѓани кои што живеат тука, изјави Николоски.
Од СДСМ велат дека Република Северна Македонија не е држава на проценти како што тврди ВМРО-ДПМНЕ, туку држава на еднакви, рамноправни граѓани.
„Пописот на населението, што ќе се одржи напролет е клучна статистичка операција, со која, по речиси две децении во државата, ќе се приберат релевантни податоци за планирање натамошен социо-економски развој.Јавноста е сведок дека како и секогаш кога се случуваат клучни работи во државата ВМРО-ДПМНЕ е против напредокот на оваа земја, а сега тоа го потврдува со обидите да го политизира пописот, за своите партиски агенди“, соопштија од СДСМ.
Според партијата, најавите за собирање потписи против пописот покажуваат неискрен однос на ВМРО-ДПМНЕ кон граѓаните, бидејќи само со потписи не се става законот надвор од сила, туку треба нов закон. А нов предлог закон може да поднесе секој пратеник во Собранието, вклучувајќи ги и тие од ВМРО-ДПМНЕ.
„Од друга страна со повиците за бојкотирање на пописот, опозицијата ги поттикнува граѓаните на прекршување на законите. ВМРО-ДПМНЕ, Мицкоски и неговиот шеф Груевски не сакаат ова земја да успее, а колку се способни да организираат попис, покажаа во 2011 година со неуспешниот обид за попис. Нивните деструктивни политики уште еднаш ќе бидат поразени. Оваа пролет по цели 19 години Северна Македонија ќе спроведе попис по сите меѓународни стандарди и по критериумите на Евростат, бидејќи тоа е во интерес на граѓаните и на државата“, додаваат од СДСМ.
