По денешните апсења на насилниците од 27 април, обвинети за терористичко загрозување на уставниот поредок и безбедноста, ВМРО-ДПМНЕ се огласи со повик за протест.
„Денеска е на удар на антидржавната хунта на Зоран Заев. Полицијата упадна во домовите на пратеници на ВМРО-ДПМНЕ, членови на Извршниот комитет, поранешни функционери на партијата и други јавни личности. Полицијата по наредба на Зоран Заев не го почитуваше пратеничкиот имунитет, туку единствено политичките наредби за пресметка со неистомислениците.
Денешниот упад и приведувањето на функционери на ВМРО-ДПМНЕ се обид да биде замолкната опозицијата и да се скрши отпорот на партијата против сите антидржавни политики што владата ги реализира периодов.
Во момент кога владата разгледува предлог закон за ослободување на криминалците од затвор, кога се најавува ослободување на убијците од Смилковско езеро и кога убијци се шетаат слободни по улиците, Зоран Заев нарачува политички прогон врз ВМРО-ДПМНЕ заради наводно терористичко загрозување на уставниот поредок“, стои во соопштението на партијата.
ВМРО-ДПМНЕ ги повикува сите членови и симпатизери на партијата и сите граѓани кои не се согласуваат со антидржавната политика на владеачката хунта да излезат на протест пред основниот суд Скопје во 13:30 часот.
Деновиве, партијата веќе закажа па потоа одложи еден протест, а како причина за откажувањето на протестот, изворите на ЦИВИЛ Медиа го наведуваат слабиот интерес на сѐ помалубројните поддржувачи на овој лидерски состав на ВМРО-ДПМНЕ.
