Полициски службеници на Секторот за внатрешни работи Тетово – Полициско одделение Галате, вчера (19.12.2023) во три трговски објекти во гостиварските села Неготино и Добридол пронашле и одзеле вкупно 6.964 парчиња разновидни пиротехнички средства, најмногу петарди, при што лишени од слобода биле три лица, соопштија од МВР.
Според информациите од СВР Тетово, во периодот од 16.50 часот до 19.10 часот полициските службеници ги лишиле од слобода И.Д.(61), од кого со одземени 3.826 парчиња и Х.Ј.(49) со одземени 2.895 парчиња, двајцата од Неготино, а го привеле Г.Р.(60) од Добридол со одземени 243 парчиња. По целосното документирање на случајот, против трите лица ќе следуваат соодветни поднесоци.
Како, што и претходно соопштија од СВР Тетово, по лишување од слобода на едно лице од Тетово (18 декември) со одземање на над 3000 парчиња разновидни пиротехнички средства, набавувањето, продавањето и активирањето пиротехнички средства е спротивно на Законот за прекршоци против јавниот ред и мир и Кривичниот законик.
Вчера, полициски службеници на СВР Тетово, исто така, на градскиот плоштад во Тетово, ја привеле 53-годишната Х.М. од тетовски Челопек кај која биле пронајдени и одземени 1686 парчиња пиротехнички средства, а десетина минути пред тоа, исто така, на плоштадот во Тетово, го привеле и 20-годишниот тетовец М.Б. со 885 парчиња пиротехника.
ЦИВИЛ уште еднаш се придружува на апелот на МВР да не се употребуваат петарди и други пиротехнички средства и ги повикува граѓанките и граѓаните да го пријават несовесното и противзаконско однесување.