Во следните две до три недели сите да бидеме крајно внимателни, апелираше денеска министерот за здравство Венко Филипче, кој рече дека има некакви позитивни приближувања, ќе се види дали е тоа почеток на крајот на епидемијата и затоа не смееме да ризикуваме уште еден силен бран.
„Имаме многу тешка година зад нас и искрено верувам дека следната ќе биде многу подобра. Во вакви услови кога епидемијата сериозно спласнува и се стабилизира да не направиме ништо таа да се влоши. Апелирам да се празнува одговорно во кругот на семејството без групирање со почитување на јасно пропишаните протоколи и мерки. Се покажа дека досегашните протоколи и мерки беа добро осмислени и домензионирани и го дадоа резултатот како што се очекуваше. Тие се димензионирани така да не се спречи слободното движење и работа, имајќи предвид колку е сето тоа тешко за сите нас“, рече Филипче.
Согласно извештајот на Институтот за јавно здравје, истакна министерот, и оваа недела продолжува падот на бројките за Ковид-19.
„Имаме намалување за 16,9 отсто на новозаболени во последните седум дена. Процентот на позитивни од тестирани бележи пад од пет проценти колку што бележи падот и на процентот на починати лица. Се намалува бројот на хоспитализирани во болниците и клиниките во Скопје и ширум државата. Во првата недела од декември имало 890 хоспитализирани, а денеска 629. Има слободен број кревети во Битола, Охрид, Прилеп, Куманово…“, рече Филипче.
Нагласи дека има се повеќе термини за тестирања што значи се намалува притисокот.
„Во втората и третата недела од декември намален е бројот на тестирања во државните и во приватните лаборатории. Ако во изминатиот период просекот на исполнување на термините беше истиот ден кога тие ќе се објавеа преку системот „МојТермин“ сега и во текот на истиот ден има слободни термини. Во анализата за втората и третата недела од декември се забележува дека државните лаборатории спроведуваат за приближно 100 проценти повеќе тестови од приватните, а се забележува и зголемување на бројот на тестови секоја недела во државните лаборатории“, додаде Филипче.
Филипче соопшти дека на некој начин епидемијата со коронавирусот стивнува и се намалува бројот на пациенти кои се јавуваат за тестирање.
„Се намалува бројот на пациенти кои се јавуваат за тестирање, што значи дека се намалува и бројот на пациенти. Доказ за тоа е се поголемиот број слободни термини и слободните болнички кревети и намалување на бројот на кревети во болничките установи, нешто што се констатираше во сите болнички установи, поточно во нивните амбуланти посебно во последната недела“, рече Филипче одговарајќи на новинарско прашање.
Филипче нагласи дека цело време ги следат сите индикатори, како тестирање, хоспитализации, прегледи во болниците. Сето тоа, како што рече, укажува на тоа дека на некој начин епидемијата стивнува.
