Во главниот град на Литванија, Вилнус беше отворен првиот украински центар во Европската унија за граѓаните кои беа принудени да ја напуштат Украина. Од почетокот на руската агресија, Република Литванија засолнила повеќе од 50.000 украински раселени лица, стои во соопштението на официјалната веб страна на претседателот на Украина.
Културниот центар е формиран на иницијатива на првите дами на двете земји – Олена Зеленска и Дијана Науседиене. Просториите за него беа обезбедени од Универзитетот Витаутас Магнус.
Симболичната лента на свеченоста ја пресекоа првата дама на Литванија, амбасадорот на Украина во Република Литванија Петро Бешта и ректорот на Универзитетот Јуозас Аугутис.
Олена Зеленска се приклучи на настанот преку видео повик од Киев.
„Кога го замисливме овој центар со колешката, дозволете ми да кажам, со мојата пријателка и голема пријателка на Украина Дијана Науседиена, сакавме Украинците кои беа принудени да дојдат во Литванија поради војната да имаат вистинско родно место. Центарот да биде навистина место каде што може да се одговори на кое било прашање – помош или комуникација. Сакавме луѓето да можат да учат овде, да го поминуваат слободното време. Да се придружат на културен настан или едукативен курс“, рече таа.
Поранешниот литвански амбасадор во Украина, Алгирдас Кумжа, потписник на Актот за повторно воспоставување на државата Литванија, стана шеф на Украинскиот центар во Вилнус.
Според планот, Украинскиот центар ќе стане место за образование, кариерно насочување, психолошка помош, рекреација за деца, млади и возрасни. Овде можете да го оставите вашето дете за воннаставни активности, да присуствувате на предавања, едукативни курсеви или да поминувате време на хоби.
Центарот ќе биде и платформа за културна дипломатија меѓу земјите, ќе ја претстави Украина, нејзината култура и идентитет во Литванија, ќе учествува во академски активности, ќе одржува креативни состаноци, концерти и други настани.
„Заедно со нашите партнери ветивме дека активно ќе соработуваме и ќе направиме се што е можно Украинците да се чувствуваат безбедно во Литванија, да добиваат медицинска и социјална помош, образовни услуги и што е најважно, да ја негуваат својата култура и да ја зачуваат виталноста на нацијата“, рече првата дама на Литванија, Дијана Науседиена. .
Подготви: Д.Мишев
