Неодговорно и на штета на граѓаните и на бизнис секторот е блокирањето на договорите од Отворен Балкан од страна на пратеникот Милошоски, изјави Националниот координатор за Отворен Балкан и регионална соработка, Марјан Забрчанец за Фронтлајн.
„Ратификацијата на договорите за слободен пристап до пазарот на трудот и за идентификациски број за граѓаните на Отворен Балкан мора да се заврши во Собранието за да може да стартува проектот за слободно ангажирање работна сила во која било од трите држави без работни дозволи“ – вели Забрчанец.
На прашањето која е потребата и кои ефекти се очекуваат од оваа новина во регионалното поврзување, Забрчанец одговори дека побарувачката и очекувањата за оваа мерка се огромни и кај граѓаните и кај фирмите.
„Побарувачката и очекувањата за оваа мерка се огромни и кај граѓаните и кај фирмите. Се очекува овој проект да пополни празнини во економијата предизвикани од недостаток на соодветна стручна и работна сила во разни дејности во секоја од трите држави. Се очекува медицински персонал во приватните болници како и туристички работници да се ангажираат во Северна Македонија, но секако и ангажирање работна сила и во други дејности во нашата држава, како и ангажирање наши граѓани во Албанија и Србија“ – изјави Забрчанец за Фронтлајн.
Тој е дециден во оценката дека кочењето на ваквите проекти директно ги погодуваат развојот и зголемувањето на бројот на работните места.
„Секој кој ќе се осмели да кочи и блокира ваков проект дејствува против раст и развој на економијата, против нови работни места и против конкурентност која носи повисоки плати“ – рече Забрчанец.
Тој смета дека Милошоски има обврска да одговори на прашањата дали се работи за координиран обид на ВМРО-ДПМНЕ да ја кочат регионалната иницијатива што ја поддржуваат граѓаните од сите три држави.
„Милошоски треба да одговори дали е ова координиран обид на ВМРО-ДПМНЕ на чело со Мицкоски да кочат регионална иницијатива поддржана од огромно мнозинство од македонските, албанските и српските граѓани. Дали овој потег на Милошоски се надоврзува на скандалозната изјава на Мицкоски од пред некој ден дека тој не знаел што е тоа Отворен Балкан и дека не знаел каква е таа регионална соработка меѓу две држави како Албанија и Србија кои не граничеле меѓу себе?“ – прашува Забрчанец.
Националниот координатор Забрчанец е убеден дека блокадите не успеваат, туку дека успева Отворен Балкан.
„Доколку станува збор за обид за блокада или кочење проект на Отворен Балкан, Милошоски и Мицкоски треба да знаат дека со тоа се прогласуваат себеси за противници на три народи, три економии и три држави. Блокадите не успеваат, успева Отворен Балкан“ – заклучи Забрчанец.
