„Работевме многу и спремни сме за соочување со сите предизвици што ги носи процесот. Немојте да ни ги гасите светлечките звезди!“, со овие зборови, премиерот Зоран Заев им се обрати на лидерите на земјите членки на Европската Унија кои утре и задутре треба да одлучат за датум за преговори за нашата земја.
Заев ги истакна последиците од евентуалното одлужување, а меѓу најопасните ги спомна спроведувањето на Преспанскиот договор, довербата на нашите граѓани кон ЕУ и оставањето простор за регресивните сили и третите страни во регионот.
“Секое одложување ќе биде прочитано како негативна одлука и ќе има многу негативни ефекти. Ќе има високо ниво на разочарување кај граѓаните и меѓу членовите во Парламентот кои го поддржаа Преспанскиот договор. Да не заборавиме дека спроведувањето на Преспанскиот договор е поврзано со отворањето на поглавјата за Европската Унија. Сакам добронамерно да предупредам дека ако не се испорача очекуваната и заслужената позитивна одлука тогаш кредибилитетот на ЕУ и довербата на нашите граѓани кон Унијата може да бидат ставени впод знак прашалник. Ова со сигурност ќе ги поттикне регресивните сили во земјата и ќе го зајакне интересот на третите страни во регионот. Ако ЕУ покаже отсуство на волја или слабост за Западен Балкан, тогаш третите страни ќе го пополнат вакуумот”, изјави Заев.
А. Зеќири
