Заев омекна за СЈО и бомбите, се најавува ли болен компромис?

Премиерот Зоран Заев денеска настапи со многу помеки ставови околу преговорите за СЈО, а кои сѐ повеќе се приближуваат до оние на опозицијата. Додека министерката Рената Дескоска досега обвинуваше дека опозицијата бара нова амнестија со ограничување или остранување на бомбите од доказните материјали, Заев денеска тврди дека аудио материјалите можат да бидат само индиции и не можат сами по себе да служат како докази.

Заев додава дека бомбите не се предмет на преговарање и дека, според актуелниот закон, поднесувањето на обвиненија е 18 месеци од преземањето на материјалите и на предметите.

„Значи, бомбите како докази, апсолутно, во самото законско решение се предвидени, тие не беа цел за преговори меѓу ВМРО-ДПМНЕ, СДСМ и другите претставници на парламентарните партии и другите пратенички групи, од проста причина што и основниот закон за специјално јавно обвинителство, членот 22, вели дека поднесувањето на обвиненија е 18 месеци од преземањето на материјалите и на предметите. И сите бомби и во предметите во кои што се поднесени може да бидат секако индиции, тие сами по себе, како докази, не може да опстојат, мора да има и материјални докази. Така да, она што треба да го знаат граѓаните, а тоа е и најважно, е дека се предметите се живи, кај што се воделе пред истражни и истражни постапки, со поднесени обвиненија, тие ќе бидат распределени за да можат обвинители и судии да утврдат дали постојат докази, за да можат да бидат процесирани како, впрочем, и секој предмет што постои во Република Северна Македонија“, изјави премиерот Заев.

„Да не создаваме филмови и фантастични очекувања“ – ова е најновото барање на премиерот Зоран Заев, поврзано со преговорите за Специјалното Јавно Обвинителство, кои според него течат понатаму. Заев тоа го оправдува со фактот дека граѓаните не му дале двотретинско мнозинство на парламентарните избори, така што, соодветно на тоа мнозинство, ќе се одреди какво решение ќе се носи за СЈО.

„Извинете вака, значи мора да ги расчистуваме работите за тоа што се создават филмови и фантастични очекувања кои што, апсолутно, според мене, не се реални. Прво, самиот систем во Република Северна Македонија е поставен на двотретинско одлучување. За да може да носиме одлука, треба граѓаните да кажат, преку гласање, што очекуват. Тие никому не му дадоа двотретинско мнозинство, за да може да испратат таква порака. Значи, еден дел, мнозинството граѓани одлучиле така како што одлучиле. Еве, мене ми дадоа, како носител на една политича опција 49 пратеници, на мојот политички опонент му дадоа 51 пратеник. Оттука, очекувањата така треба и да ги димензионираме“, изјави Заев.

Тој додаде, исто така, дека веќе нема да се објават аудио материјали од прислушуваните разговори, бидејќи 70% биле приватни и недозволени за објавување. Одговорајќи на новинарско прашање, Заев рече дека тоа што се процесирало досега е целиот криминал кој бил откриен од бомбите и сѐ друго се приватни разговори кај што нема криминал.

Арбен Зеќири