Премиерот Зоран Заев најави дека сите опции околу предвремени парламентарни избори се во игра, доколу во јуни нема препорака за отпочнување на пристапните преговори со Европската унија, но додава дека е оптимист за добивањето датум.
Тој порача дека ќе се чека одлуката на Европскиот совет, во јуни или јули па потоа ќе одлучи дали ќе се оди на предвремни избори, дали ќе има реконструкција на Владата или ќе се бира целосно нов минитсерски кабинет.
Заев смета дека земјава е светол пример во регионот, дека има големи постигнувања во сферата на реформите, дека нема незатворени прашања со соседите и дека е оптимист оти земјата ќе го добие датумот за почеток на преговори кој долго го чекаме и го заслужуваме. Ако има индиции дека е можно добивање датум ќе продолжат активностите за реконструкција. Во спротивно, вели Заев, можни се сите опции од враќање на мандатот и предвремени избори, нова влада и преземање одговорност за недобивањето датум.
„Сите можности се отворени затоа што ова е крупно прашање. Република Северна Македонија испорача за пример сто проценти реформи, нема незатворени билатерални прашања, ние сме светол пример во регионот и доказ за моќта на привлекување на ЕУ“, изјави премиерот Зоран Заев.
Соодветно на настаните, додаде тој, замолувам да оставите државата да ги изгради своите стратегиски проекции во насока на добивање на 15 години очекуваниот датум за преговори.
„Секако дел од државната стратегија се сите овие работи што се случуваат и состаноци што ги држиме и верувам, јас сум Зоран Заев оптимистот, дека ќе го добиеме датумот за преговорите“, рече Заев.
Запрашан дали е можна реконструкција на владата или враќање на мандатот и нови избори, премиерот Заев рече дека можни се сите опции.
„Реконструкцијата е поприлично готова од директорски до министерски места. Овие денови речиси секој час добиваме нови информации. Очекувам потврда за средба со германската канцеларка Ангела Меркел. Следната недела ќе бидам во Берлин за нашата економска агенда. Во зависност од сите информации што ги добиваме така и ќе постапуваме во делот на промените што треба да се случат во извршната власт“, истакна тој.
Посочи и дека доколу е извесно ова лето во јуни или јули да се добие датумот за преговорите, ќе се продолжи со реконструкцијата на Владата.
„Доколку има одложување можни се сите варијанти како што е враќање на мандатот и отворање внатрешна дебата за преземање чекори како што се предвремени избори. Другиот чекор е нова влада и третиот чекор се преземања одредена одговорност за неуспешното доделување на датумот за преговори после се што направивме“, вели Заев.
Следната седмица премиерот ќе замине за Берлин на средба со канцеларката Ангела Меркел, во обид да ја убеди Германија да даде зелено светло за земјата да добие датум за почеток на преговори.
Пред неколку дена во Берлин престојуваше и претседателот на опозициската, ВМРО-ДПМНЕ, Христијан Мицкоски, и од германсктие соговорници побара македонските граѓани да не бидат казнети поради владините политики, и дека Македонија треба да добие датум за преговори.
