Во Софија денеска започна лидерскиот Самит за Западен Балкан во рамките на Берлинскиот процес, на кој оваа година ко-домаќини се Република Бугарија и Република Северна Македонија.
Заради ситуацијата со КОВИД-19 Самитот е организиран со физичко присуство на премиерите Зоран Заев и Бојко Борисов во Софија и со учество преку видео конференциска врска на останатите учесници.
„За мене, а верувам и за сите нас, ова е доказ дека регионот силно го прифати овој процес за свој. Истовремено, тоа обезбедни извонредна платформа за понатамошно негување на нашите односи. Овој Самит се случува во времиња на пандемија и сите ние се бориме со огромни предизвици за заштита на нашите граѓани и спречување на тешки економски нарушувања. Во такви околности, заедничкото домакинство на Берлинскиот процес во изминатите неколку месеци работеше на спроведување на бројни активности насочени кон одржување енергична соработка во многу области и на остварување на видливи и опипливи резултати“, истакна Заев на прес-конференцијата на Самитот за Западен Балкан во рамки на Берлински процес.
Заев истакна дека водечкиот принцип на Берлинскиот процес има за цел да обезбеди континуитет на започнатите иницијативи во рамките на процесот и да се фокусира на резултатите со забележливи позитивни ефекти во регионот.
„Исто така, ја искористивме политичката платформа на овој процес за понатамошно туркање на одредени иницијативи, како што се регионалниот договор за патување со лична карта, проширување на зелените ленти на Западен Балкан кон коридорите на ЕУ и соработката во областа на здравството и регионалниот одговор на пандемијата. Исто така, ја продолживме нашата соработка со граѓанското општество, ТинкТенк заедницата, во прашањата поврзани со младите што како тема се јавуваат на повеќе настани. На денешниот состанок имавме можност да дискутираме за клучните стратешки насоки за нашиот регион, визијата за акцискиот план за заеднички регионален пазар и зелената агенда за Западен Балкан. Поддршката за двете иницијативи ќе го поттикне економскиот раст и развојот во регионот, со поддршка и на европските фондови, но исто така и ќе се осврнат на некои од актуелните еколошки и здравствени предизвици, нудејќи огромен потенцијал за раст и креирање на нови работни места“, додаде Заев.
Премиерот истакна за идејата за интерконекција, која била во сржта на Берлинскиот процес, еволуирала во поврзаност во многу поширока смисла.
„Регионот ја препозна важноста на деловната поврзаност, младинската мобилност, дигиталната поврзаност, дијалогот со граѓанското општество, културната размена со цел да се конкурира на глобалните пазари, како и поради општата благосостојба на своите граѓани. Дополнително, ЕУ исто така храбро ја потврди поддршката на Западен Балкан, со најавените 9 милијарди евра во грантови, надополнети од новиот инструмент за гаранција за Западен Балкан со кој треба да се зголемат инвестициите за дополнителни 20 милијарди евра“, вели Заев.
Тој додаде дека се согласиле дека треба да се унапредат нашите напори за дополнителен и реален напредок во реформските процеси, како и регионалната економска соработка.
„Сите ние се согласивме дека треба да ги унапредиме нашите напори за дополнителен, реален напредок во реформските процеси, како и да се унапреди регионалната економска соработка и да се постават темелите за одржлив рас. Само интегриран и поврзан регион може сигурно да чекори кон ЕУ. Визијата за акцискиот план за заеднички регионален пазар и зелената агенда го покажуваат вистинскиот правец. Ние влеговме во нова фаза од нашата соработка, регионот ја превзема сопственоста на многу иницијативи и процеси и носи резултати“, додаде Заев.
А. П.