Заменикот министер за одбрана, Башким Хасани денеска обрати на отворањето на 14. Регионален состанок за механизмите на родова еднаквост во Министерствата за одбрана и во вооружените сили во Западен Балкан во организација на UNDP SEESAC (Клириншката куќа за контрола на малото и лесно оружје во Југоисточна и Источна Европа), пренесува прес службата на Министерството.
Хасани во своето обраќање истакна дека денешниот регионален состанок е потврда за заедничката волја и посветеност на министерствата за одбрана на Црна Гора, Србија, Босна и Херцеговина и на Северна Македонија за натамошно унапредување на родовата перспектива во вооружените сили.
„Се фокусираме на поцврста родова интеграција во безбедносниот сектор, за заедно да ги продолжиме промените и најважно од се, да одиме напред во заедничка акција. Денес, после 10 години успешни иницијативи и активности во рамки на проектот, слободно може да се пофалиме со постигнати резултати во повеќе сегменти. Тоа ни го потврди Втората регионална студија со која го измеривме напредокот кон порамноправна положба на жените во министерствата и армиите на Северна Македонија, Босна и Херцеговина, Србија и Црна Гора“, рече Хасани.
Заменикот министер додаде дека високата родова свест кај вработените е меѓу другото и благодарение на поддршката од UNDP SEESAC во спроведувањето на планираните активности. Хасани ја потенцира видливата застапеност на жените во Армијата чиј процент во последните 10 години е двојно зголемен односно сега изнесува 10,15%, при што процентот на жени офицери сега е 16,54%, а жени на раководителки на сектори во Министерството за одбрана е 39%.
„Во насока на исполнување на условите за поставување на жени на командни позиции, Министерството обезбеди високи школувања за жени офицери од Армијата на Школата за национална одбрана и 7 жени офицери со завршена Командно штабна академија. Но, сепак не застануваме. Продолжуваме понатаму. Имаме поставено уште повисоки цели преку примена на глобалната агенда за „Жени, мир и безбедност“, кои се опфатени во Вториот Национален акциски план“ порача Хасани.
На денешното отворање на 14. Регионален состанок се обратија амбасадорот на Словачката Република, Хенрик Маркуш и раководителката на UNDP SEESAC, Бојана Балон. На овој дводневен состанок учествуваат претставници од Министерствата за одбрана и вооружените сили на Босна и Херцеговина, Србија, Црна Гора и од нашата земја.
