Запалено возилото во дворот на семејната куќа на директорот на регионалната Телевизија М-Нет, Благој Серсемов. Возилото е целосно опожарено, Серсемов вели дека ова го смета за директен удар врз сите медиуми, не само кон него лично, а загрозена е безбедноста и на членовите на неговото семејство.
По опожарување на возилото на директорот на штипската Телевизија М-Нет пристигна реакција и од Здружението на новинари на Македонија. Ваквиот чин на вандализам претставува сериозна закана за безбедноста на новинарите и медиумските работници, како и напад врз слободата на говорот и правото на јавноста да биде информирана“, соопшти Здружението.
„Заканите од ваков тип се неприфатливи во едно демократско општество, кое тежнее кон заштита на медиумските права и безбедноста на сите новинари. Овој напад не е само физички чин на уништување на имот, туку има цел да ги замолчи новинарите и да го заплаши медиумскиот сектор во земјата во целост“, се вели во соопштението на ЗНМ.
За случајот со опожарената возило ќе бидат извесетени и сите меѓународни организации.
Од Основното јавно обвинителство во Штип информираат дека издадена е наредба и насоки за расчистување на случајот, ќе се прави проверка и дали постојат евентуални снимки од видео надзор на подрачјето каде е опожарено возилото.
„Наредбите се да се извршат соодветни вештачења со кои ќе се утврдат причините за пожарот и идентификација на можен сторител на евентуално кривично дело. По наредбите и насоките постапува Министерството за внатрешни работи и вешто лице од Дирекцијата за заштита и спасување“, велат од ОЈО-Штип.
Агенцијата за аудио и аудиовизуелни медиумски услуги најостро го осудува чинот на опожарување на возилото на сопственикот на регионалната телевизија М-Нет, ХД од Штип, Благој Серсемов, од страна на непознати сторители во дворот на неговата семејна куќа.
„Заканите и заплашувањата насочени кон медиумите ја поткопуваат демократијата, слободата на говорот и слободата на информирање. Безбедноста на медиумските работници е клучна за постоење на независни и професионални медиуми, кои се еден од главните стожери на демократските процеси и кои придонесуваат за унапредување на слободата на изразување“, велат од АВМУ.
ЗНМ и АВМУ апелираат, Министерството за внатрешни работи во најскоро време да го расчисти случајот и да ја информира јавноста за причините кои довеле до овој вандалски чин.
Д. М.
Фото: скриншот ЗНМ
