Утрово, во 8 часот започна прославата на Илинден, 114-годинишната од Илинденското востание и 73 -годишнината од Првото заседание на АСНОМ. Македонскиот премиер Зоран Заев и бугарскиот премиер Бојко Борисов положија цвеќе и се поклонија на гробот на Гоце Делчев во црквата „Свети Спас“ во Скопје.
На свеченоста, пред високата бугарска државна делегација, дипломатскиот кор во земјата и присутните гости,се обрати премиерот Заев, кој на граѓанките и граѓаните на Република Македонија им ги честиташе двата Илиндена.
„Каква Македонија ќе изградиме, таква ќе ја имаме!“, порача премиерот Заев и повика на „помирување на минатото и сегашноста, заради иднината“.
Извор: Влада на Република Македонија
„Историјата и минатото ги ставивме да бидат цврсти темели на коишто почнавме да ја градиме европската и евро-атлантската иднина на Република Македонија којашто води до квалитетен живот. Го послушавме Делчев. Тој рече: ‘Нека не се губи времето!’. И се здруживме, ги подадовме рацете меѓу нас и создадовме пат кон развојот. За развој се потребни доброволно подадени раце на граѓани и народи кои се потпираат и поддржуваат и така заеднички чекорат стабилно напред“, порача меѓу другото, премиерот Заев.
Со овој заеднички чекор на двата премиера, завршува дводневната посета на Борисов и бугарската делегација на Македонија, која во дел од македонскатаи од бугарската јавност беше оценета како пресвртница во меѓусебните односи.
Вчера, Заев и Борисов го потпишаа Договорот за пријателство, добрососедство и соработка, кој според Заев е историски чекор за Македонија. Тој вчера ги повика опозициониот лидер Никола Груевски и ВМРО-ДПМНЕ да дадат поддршка на Договорот.
Лајтмотивот на сите чествувања по повод Илинден е „Наша Македонија – без разлика на вера, етничка припадност, пол и убедувања. Бидејќи од дедо – прадедо си живееме како браќа и сестри на оваа земја! За право, за слобода и за човечки живот“, кој е инспириран од Крушевскиот манифест.