Меѓународниот литературен фестивал Берлин ги повика сите поединци, институции, училишта и медиуми кои се залагаат за човековите права, да учествуваат во светското читање на Универзалната декларација за човекови права, за да го поддржат и зајакнат концептот на човековите права во светот, на 6 септември 2017 година.
ЦИВИЛ -Центар за слобода, организација чија визија и мисија е активно промовирање и одбрана на човековите права и слободи, организира отворен настан под мотото „ЦИВИЛите со пораки и стихови за човековите права“ за одбележување на овој ден со читање на Универзалната декларација за човекови права и поезија. Настанот ќе се одржи во среда, на 6 септември, на платото пред седиштето на организацијата, на ул. Максим Горки бр. 31, со почеток во 16:30 часот. ЦИВИЛ ги поканува сите граѓан(к)и, активист(к)и и медиуми да се приклучат на настанот и да подигнат копија од Универзалната декларација за човекови права. ЦИВИЛ ќе започне и дискусија на интернет, а настанот ќе го пренесува во живо на својата Фејсбук страница.
Меѓународниот фестивал на литературата Берлин ги повика сите културни и политички институции, училишта, универзитети, медиуми и поединци низ целиот свет да се приклучат кон читањето на Декларацијата, а потоа да дискутираат за 30-те членови кои ја сочинуваат.
Овој настан има за цел да го потсети секој поединец и секоја институција, односно целото општество, за потребата сите заеднички да се стремиме кон промовирање на човековите права и слободи.
По повод неодамнешната смрт на писателот, активист за човекови права и лауреат на Нобеловата награда за мир, Лиу Ксијаобо, меѓународниот литературен фестивал Берлин повикува и на читање на Повелбата 08, манифест на 360 интелектуалци од Кина, објавена во 2008 година, на 10 декември, по повод шеесетгодишнината од Универзалната декларација на човековите права и слободи.
ЦИВИЛ ќе се придружи кон оваа светска акција на почитување и промовирање на универзалните човекови права и слободи потсетувајќи уште еднаш на децениската борба против еден режим посветен на софистицирана узурпација на граѓанскиот простор и слободата на изразување на секој поединец во Македонија.
Со промените на општествената и политичка сцена во земјата, ЦИВИЛ утре ќе потсети дека борбата за општествено, политичко и индивидуално ослободување се уште не е завршена.
