Иницијативата која се претставува како Граѓанско движење против осиромашување и вчера повторно блокираше две крстосници во центарот на Скопје, за да „потсети дека постои…“
Екипата на ЦИВИЛ Медиа најпрвин се обиде да земе изјава од неколку лица кои ја блокираа раскрсницата кај ТЦ „Палома Бјанка“. Кога ги прашавме присутните дали се дел од организаторите на протестот, тие ни одговорија дека се жители од соседните згради и дека само следат што се случува. Но, кога еден од нив, забележа како камерата на ЦИВИЛ Медиа ги снима автомобилите, се доближи до нашата екипа, со намера да ни објасни дека, според него, не било законски да се снимаат автомобилите кои служеа како блокада и нивните регистарски таблички.
На повторното прашање дали е дел од протестот, граѓанинот кусо ни одговори дека е дел од него, но не знаеше да каже ниту кој го организира, ниту за што се протестира.
„Тука сме да потсетиме дека постоиме!“, кусо рече нашиот соговорник. Кога го прашавме дали протестот е поврзан со оној, кој истовремено се случуваше пред Владата на Република Македонија, исто како и минатата недела, тој ни одговори дека не знае, бидејќи „минатата недела бил на одмор“.
Десетина автомобили на крстосницата кај ТЦ „Палома Бјанка“ и дваесетина автомобили пред зградата на Владата, го блокираа сообраќајот во центарот на Скопје, со цел, како што подоцна дознавме од изјавата на организаторите пред Владата, да се искаже незадоволството на граѓаните од „влошувањето на веќе кревката економска ситуација во државата“, веројатно, во однос на до скоро фреквентната реклама на поранешната власт за „најбрзорастечката економија во светот“. На прес-конференцијата пред Владата, еден од активистите од иницијативата, Жарко Здравковски, прочита изјава за наводното незадоволството на граѓаните од осиромашувањето, но остана нејасно дали се работи за вистински протест или за уште еден обид за спин на поранешната власт која не може да се навикне на улогата на опозиција што ѝ ја доделија граѓаните и на сите начини се обидува да ја дефокусира јавноста од опструкциите во Собранието и од фактот дека врвното раководство на ВМРО-ДПМНЕ е предмете на особен интерес на СЈО.
Иако Македонија веќе навикна на контра-демонстранти, контра-НВО, контра-пленуми, контра-штрајкови…, интересна беше сликата на крстосниците на кои меѓу автомобилите кои ги блокираа, немаше ниту едно „фиќо“ или „стокец“, на пример, туку сосема пристојни возила, кои ни малку не асоцираат на осиромашување, против кое се бори оваа иницијатива.
Маја Ивановска
Камера: Маја Ивановска / Биљана Јордановска
Монтажа: Даниела Нисева
