НАТО
Владата реши членството во НАТО да го обележи со свечена церемонија по повод подигнувањето на знамето на НАТО. На свечената церемонија присустваа сите министри и високи функционери, партиски лидери и пратеници. Видливо беше отсуството на претставници на ВМРО-ДПМНЕ и на претседателот на државата Ѓорѓе Иванов. Од Владата известија дека Иванов бил уредно поканет и покрај информациите што излегоа од претседателскиот кабинет дека до нив не стигнала никаква покана.
Говорот на премиерот траеше околу 30 минути во кој, освен значењето да се биде 30-та членка на НАТО, содржеше и идни реформски планови на патот кон ЕУ, визија за иднината на Македонија, предпредување до сите коруптивни системи во државата, како и образложување за промената на името. Премиерот се заблагодари и на претходните претседатели борис Трајковски и Кор Глигорв за нивните заложби за безбедна Македонија и на грчкиот премиер Алексис Ципрас за постигнувањето на Преспанскиот договор.
Министерката за одбрана Радмила Шекеринска, пак, на 13 и 14 февруари во Брисел ќе учествува на состанокот на Северноатлантскиот совет на НАТО на ниво на министри за одбрана, што е прво учество на министер од нашата земја на официјален состанок на Алијансата по потпишувањето на Протоколот за пристапување.
Заминувањето на Џес Бејли
По повод завршувањето на неговиот мандат Џес Бејли, Амбасадорот на САД, денеска се сретна со заменик претседателот на Владата задолжен за европски прашања, Бујар Осамни.
На средбата Османи изрази благодарност до САД, како стратешки партнер и пријател, со чие присуство и активно учество, како што рече Османи, се остварени најважните успеси на земјава од нејзината независност, но и остварување на целта – влез во НАТО.
Претседателски избори
Конечната одлука за тоа кој ќе биде кандидат на СДСМ ќе се донесе на Конгресот на партијата кој ќе заседава на 3 март. Досега единствениот познат пријавен кандидат Ѓорѓи Филипов, на социјалните мрежи истакна дека одлуката ја донесел во консултација со членовите на семејството и на иницијатива на многу пријатели, познаници, колеги од Македонија и надвор од неа, кои веруваат во неговите капацитети, знаење и искуство.
Говор на омраза
Константин Плевнеш, кој предава на Универзитетот за аудиовизуелни уметности ЕСРА, континуирано објавува коментари со говор на омраза на својот Фејсбук профил. Меѓу останатите, пораки со говор на омраза беа упатени кон новиот декан на Универзитетот ФОН проф. д-р Љубомир Фрчковски и проф. д-р Катерина Колозова.
Освен брзата реакција на институциите во случајот со Миленко Неделковски и неговиот говор на омраза против Грците кога се ситеше на несреќата на оние што настрадаа во минатогодишните пожари во Грција, не видовме дека нешто друго се прави. Голем број јавни личности се до денешен ден мета на говорот на омразата на Неделковски, но тој не одговара за тоа. Случајот со Плевнеш е само уште еден во низата каде што се гледа една инертност на институциите, наспроти декларираната заложба дека ќе се борат против говорот на омразата и поттикнувањето на омразата.
Загадување
Заменик-министерот за животна средина просторно планирање, Јани Макрадули, во телевизиска емисија изјави дека не се точни некои од наодите во Извештајот на Европската организација на врховни ревизорски институции – EUROSAI за квалитетот на воздухот, во кој се наведува дека индустриијата е најголемиот загадувач во земјата.
На оваа изјава реагираше и Државниот завод за ревизија велејќи дека сите податоци кои се презентирани во Меѓународниот ревизорски извештај за квалитетот на воздухот се релевантни се обезбедени од надлежни институции од ревизорскиот тим.
Макрадули изјави дека апсолутно е неточна констатацијата за индустријата, бидејќи таму е само лоцирана и земена РЕК Битола и влијанието на ЦО2 и СО2, како и дека „тој извештај датира од 2017 година и дека Меѓунардониот ревизорски извештај „лоцира некои точки кои делумно се точни, делумно не се точни“.
Епидемија
За само три дена, починаа три деца поради компликации од морбили. Епидемилозите апелираат сите невакцинирани да се вакцинираат, оти друг начин на заштита од морбили нема. Од почетокот на епидемијата до сега, регистрирани се 220 заболени, а вакцинирани се околу 9000 деца. Дури 50% од децата родени во 2017 година не се вакцинирани со МРП вакцината.
Перспективи 2019
Општествено-политичката реалност и перспективите во 2019 година ќе бидат ставени под лупата на голем број учесници на конференцијата #Перспективи2019 што ќе се одржи утре, на 13 февруари, во Кино Култура, со почеток во 11 часот.
Воведни излагања ќе имаат германскиот амбасадор Томас Герберих и Министерката за труд и социјална политика, Мила Царовска. Списокот на говорнички и говорници содржи значајни имиња од областа на политиката, медиумите и граѓанското општество, што секојдневно се чувари на објективните сознанија и факти. На Конференцијата ќе се говори на темите „Меѓу надежите и реалноста“ (општествено-политичките процеси и економските прашања) и „Историски завршници и отворање на новите перспективи“ (Евроатлантски интеграциски процеси).
Настанот е дел од проектот „Граѓанките и граѓаните за слободно општество“, финансиран од Министерството за надворешни работи на Сојузна Република Германија.
Б. Јордановска