ВЕСТ НА ДЕНОТ: Се предлага скратување на полицискиот час, продолжено време за движење на младите и постарите и задолжително носење маска
Можно е малку да се намалат рестрикциите на движење, но само ако се засилат мерките на лична заштита, рече денеска министерот за здравство Венко Филипче. Тоа значи пократок полициски час, но обврска за носење заштитна маска.
„Сите рестриктивни мерки за заштита од коронавирусот дадоа добри резултати. Мерките мора да останат во сила се додека не сме целосно сигурни дека состојбата е под контрола и дека сме го поминале пикот на болеста. Сепак, најновите анализи и проекции покажуваат дека се создадени услови за благо релаксирање на рестрикциите за движење, но на сметка на подигнување на мерките на лична заштита и согласно овие анализи Министерството за здравство и Комисијата доставија до Владата предлог–измени во мерките за ограничување на движењето и воведување нови мерки за лична заштита на населението“, истакна на онлајн прес-конференција министерот за здравство Венко Филипче.
Оваа комбинација на мерки, посочи, ќе дозволи луѓето порастеретено да се движат, но истовремено зголемувајќи ја потребата за лична заштитна опрема на секој граѓанин додека се движи.
„Согласно тоа, предлогот е да се направат следните измени: полицискиот час секој работен ден да започнува во 19 часот наместо во 16 часот како што беше досега. Со ова ќе се добијат дополнителни часови граѓаните да ги завршат обврските и да набават намирници. За повозрасните граѓани, наместо од 10 до 12 часот, да се продолжи времето на движење од 8 часот до 12 часот, и продолжување на периодот во кој се движат младите до 18 години и тоа ќе биде од 13 до 16 часот. Предлог е полицискиот час за време на викендот да остане, но со скратено време и сега да почне во сабота во 13 часот и да заврши во понеделник во 5 часот. Останува забраната за групирање на граѓаните и сите други мерки кои се во сила во однос на физичката дистанца, користењето на јавните површини и парковите“, рече Филипче.
ВОНРЕДНА СОСТОЈБА
Министерството за здравство информира дека денеска Институтот за јавно здравје регистрирал 24 излекувани пациенти, кои се лекувале во домашни услови.
Излекувани пациенти се евидентирани во: Скопје – 4, Дебар – 4, Струмица – 1, Куманово – 1, Штип – 3, Прилеп – 3, Кочани – 5 и Тетово – 3.
Од министерство истакнаа дека во изминатите 24 часа се потврдени 7 нови случаи на КОВИД-19, а по градови: Куманово- 2, Тетово- 3 и Кочани- 2.
*
Екипите на општинскиот штаб за заштита и спасување и денеска доставуваат пакети за социјално загрозените семејства. Граѓаните можат да се јават на телефоните 075-323-569, 075-207-126, 077-719-494 и да добијат пакети со храна и средства за хигиена и дезинфекција.
*
Изминатото деноноќие во државава 117 лица не ја почитувале забраната за движење. Од нив, 89 се приведени, а за останатите ќе следуваат соодветни казни, соопшти МВР.
*
Премиерот Оливер Спасовски на Фејсбук објави дека „200 излечени наши граѓани од КОВИД-19 е веста што ни дава дополнителна мотивација да продолжиме заеднички со лечењето и со спречувањето на ширењето на коронавирусот“.
*
Автобусите на ЈСП Скопје и приватните превозници од денеска продолжуваат да сообраќаат во две смени, од 5 до 9 часот и од 13 до 16 часот.
ФЛЕШ ВЕСТИ
За три денари се зголемува цената на акцизата за нафтените деривати во Република Северна Македонија. Оваа уредба со законска сила за примена на законот за акцизите за време на вонредна состојба денеска ја донесе Владата како мерка за справување со кризата предизвикана од корона вирусот КОВИД-19.
*
Бензините од ноќеска на полноќ поскапуваат за 3,5 денари по литар, а цената на дизелот се зголемува за 1,5 денари, одлучи денеска Регулаторната комисија за енергетика (РКЕ).
*
Зголемувањето на акцизата на нафтата за три денари е антикризна мерка, донесена по предлог на Министерството за финансии, во претходни консултации со експерти и со сите засегнати страни, рече денеска владиниот портпарол, Муамет Хоџа.
*
Вкупно 73 граѓански организации, мрежи и платформи бараат Владата да ја преиспита и промени одлуката со која финансиската поддршка за невладиниот сектор се намалува за околу 525.000 евра.
*
Заменик претседателот на Владата задолжен за европски прашања, Бујар Османи во улога на Национален координатор за распределба на странска помош во земјава оствари видео-конференција со билатералните донатори.
*
Претседателот Стево Пендаровски во денешниот телефонски разговор со специјалниот претставник на Европската Унија за дијалогот Белград – Приштина и други прашања за Западен Балкан, Мирослав Лајчак, констатирал дека со назначувањето на специјалниот претставник, Европската Унија испраќа позитивен сигнал дека регионот е меѓу приоритетите на Унијата.
СЛОБОДНА ЗОНА
„После првата најава – макар и со „половина уста“ – дека вирусната епидемија е (навистина?) ставена под контрола и дека на почетокот од мај може да се очекува попуштање на општонародниот карантин, очекувајте дека во Македонија се враќаме на омилената општествено-политичка тема: избори!“, пишува Сашо Орданоски во Преживеавме? Ајде назад на избори!
А. Петровска
