УШТЕ ЕДЕН СМРТЕН СЛУЧАЈ Пациент (45) од Скопје, позитивен на КОВИД-19, вечерва починал на пат кон болницата „8-ми Септември“, соопшти владината прес-служба. Според Институтот за јавно здравје (ИЈЗ), пациентот бил тестиран на Ветеринарен факултет.
ДНЕВНИ СТАТИСТИКИ Министерот за здравство Венко Филипче на прес-конференцијата попладнево информираше за пет починати пациенти – четворица на Клиниката за инфективни болести (од нив еден од Куманово, од Лабуништа, од Челопек, од Штип) и уште еден пациент починал во Куманово.
НАТО Потреба од здружување на силите и нагласена солидарност меѓу сојузниците со цел успешно справување со кризата која има не само здравствена, туку и социјална и економска димензија, констатирале претседателот Стево Пендаровски и генералниот секретар на НАТО, Јенс Столтенберг во денешниот телефонски разговор.
КРИВИЧНИ Јавното обвинителство досега поднело кривични пријави против повеќе од 500 лица за непочитување на мерките за спречување или сузбивање на болеста КОВИД-19. Само во Скопје се пријавени 178 лица кои не ги почитувале пропишаните мерки. Пријави се поднесени и за граѓани на Дебар, Прилеп, Битола, Куманово, Струмица, Гостивар, Тетово, Гевгелија, Кавадарци, Делчево, Радовиш, Берово, Свети Николе, Штип, Охрид, Кичево, Струга и Кочани.
ТУРСКА ДОНАЦИЈА Владата на својата 37-мата седница го утврди текстот на договорот меѓу Република Северна Македонија и Република Турција за донација на медицинска опрема и средства, наменета за здравствениот сектор, која се состои од 50.000 парчиња заштитни медицински маски, 1000 заштитни скафандери и 1000 дијагностички тестови.
ОГРАНИЧУВАЊЕ Владата донесе Уредба со законска сила за ограничување на исплата на додатоци и надоместоци на плата за вработените во јавниот сектор за време на вонредна состојба.
АПЛИКАЦИЈА СТОП КОРОНА Владата ја разгледа и усвои информацијата за StopKorona! – мобилна апликација за справување со КОВИД-19, и го овласти Министерот за здравство Венко Филипче да го потпише Договорот за донација помеѓу Друштво за информатичка технологија Некстсенс ДОО, како Давател на донацијата и Министерството за здравство на Република Северна Македонија како примател на донацијата, соопшти владината прес-служба.
НАЈЗАГРОЗЕНИ Повозрасните се најзагрозени од последиците на корона вирусот. Официјалните податоци покажуваат дека лицата над 60 години најтешко ја надминуваат заразата, која, пак, за оние што имаат и други болести, најчесто е фатална.
Затоа, владиниот кризен штаб донесе неколку уредби со кои се ограничува движењето на лицата над 67 години како и на оние под 18 години за да не се среќаваат категоријата која најмногу може да ја пренесе болеста и несвесно, со оние кои спаѓаат во најзагрозената категорија. Но, токму повозрасните, деновиве се оние кои најмногу ризикуваат.
Д. Муратов
