ДНЕВНИ СТАТИСТИКИ Министерството за здравство информира дека денеска попладне се регистрирани уште две лица од Штип оздравени од Ковид-19, кои со лесна слика на болеста беа на домашно лекување, а под постојан надзор на лекарскиот тим од болницата во Штип.
СОЦИЈАЛНА ЗАШТИТА Министерството за труд и социјална политика ги информира домаќинствата кои останале без приходи или биле дел од неформалната економија за правото на гарантирана минимална помош (ГМП). Со цел олеснување на последиците од здравствено-економската криза, со Уредба со законска сила за примена на Законот за социјалната заштита за време на вонредна состојба, овозможен е брз пристап во системот на социјална заштита.
КРЕДИТИ Владата на денешната 38-ма седница ја задолжи Развојната банка да склучи договори за кредит со кредитобарателите кои ги исполнуваат условите и критериумите за бескаматни кредити. Според информацијата на Развојната банка, од обработените барања условите ги исполниле 136 компании со 1.737 вработени, и на нив им се одобруваат бескаматни кредити во вкупен износ од 1.263.079 евра.
ЈАВЕН ПРЕВОЗ Јавното сообраќајно претпрјатие (ЈСП) Скопје информира дека од утре, четврток (9.04.2020 год), па секој работен ден, јавниот превоз ќе функционира од 5 до 9 часот, па од 13 до 16 часот, односно од 9 до 13 часот автобуси нема да сообраќаат.
ДОЗВОЛИ ЗА ДВИЖЕЊЕ Министерството за информатичко општество и администрација од денеска пушти во употреба нова електронска услуга за секој граѓанин да се пријави за потребна дозвола за движење во време на забрана, преку порталот uslugi.gov. mk, наместо како досега со праќање мејл до МИОА.
Граѓаните кои имаат потреба од итна медициска помош за време на полициски час, можат без никаква дозвола да појдат до здравствена установа. Доколку бидат запрени од полиција потребно е да кажат каде одат, а доколку пак тоа го злоупотребат ќе следат санкции.
Ова денеска го соопшти дополнителната заменичка на министерот за внтарешни работи Славјанка Петровска одговарајќи на прашање на инфорнативанат видеосесија на Владата.
ДОПОЛНИТЕЛНИ МЕРКИ Повеќе од тројца патници, вклучително и возачот не смеат да се возат во ист автомобил, гласи едно од ограничувањата за време на вонредната состојба во државава, соопшти Славјанка Петровска, дополнителен заменик на министерот за внатрешни работи.
ЗДРАВСТВЕНИ РАБОТНИЦИ Во соработка со Град Скопје ќе се организира превоз со возила на ЈСП и со други возила за лицата што имаат дозволи и одат на работа во време на забрана за движење, пред сè, за вработените во здравствени установи и Клиничкиот центар, кои не можат сами да се организираат додека трае полицискиот час, соопшти министерот Дамјан Манчевски.
ПОРАКИ Министерот за здравство Венко Филипче со порака на Фејсбук им посака брзо закрепнување на сите пациенти и истакна дека очекува сè почесто да слушаме позитивни вести, откако вечерва беше објавено дека од коронавирусот се оздравени двајца пациенти од Штип.
РАБОТНИ ОДНОСИ Одјавите во Агенцијата за вработување не значат престаноци на работниот однос кај лицата. Во споредба со минатата година нема драстични промени во пријавите и одјавите што ги прават работодавачите. Ова вечерва во емисијата Топ тема на ТВ Телма го истакна директорката на АВРСМ Билјана Јовановска прашана за гужвите пред Агенцијата и дали тоа се должи на отуштања на работници.
А. Петровска
