ЛЕКУВАЊЕ Во Дебар веќе седми ден нема новодијагностицирани со КОВИД-19 а само уште двајца од досега заразените се на домашно лекување.
„До сега извршени се повеќе од 250 тестирања,при што позитивни на КОВИД-19 се 51 лице,од нив двајца од Центар Жупа. Исто така извршени се повеќе од 50 ретестирања за да се потврди негативниот резултат, односно дека заболените лица се оздравени“ изјави за МИА, градоначалникот на Дебар Хекуран Дука, кој раководи и со општинскиот Оперативен штаб.
*
РОДОВО НАСИЛСТВО Во повеќе земји во светот расте стапката на семејно насилство, како последица на мерките за самоизолација што се преземаат за справување со ширењето на корона вирусот.
*
ИНИЦИЈАТИВА Триесетина пратеници од СДСМ, НСДП, независната пратеничка група на ВМРО-ДПМНЕ, Алијанса на Албанците, Алтернатива и ДПА се потпишани на иницијативата на пратеничката група на СДСМ за свикување седница на Собранието на која би се потврдиле двете одлуки на претседателот на државата за прогласување вонредна состојба во државата од по 30 дена поради пандемијата со Ковид-19.
*
РЕСТРИКЦИИ Од утре се намалуваат рестрикциите на движењето, објави министерот Венко Филипче на својот профил на Фејсбук.
Почнувајќи од утре, четврток, 23 април, се намалуваат рестрикциите на движењето. Секој работен ден, од понеделник до петок ќе биде дозволено движењето на граѓаните од 05:00 часот наутро до 19:00 часот. Забраната за движење во целата држава ќе почнува во 19 часот и ќе трае до 05 часот наутро, посочи Филипче.
*
ДЕМАНТ Клиниката за инфективни болести и фебрилни состојби денеска соопшти дека во целост ги демантира наводите на мајката со четиримесечното бебе, која тврди дека лежат во болница и ниту еден доктор за тоа време не дошол да им ги каже резултатите од тестовите за КОВИД-19.
*
ПОЗИТИВНИ ВЕСТИ „Расте бројот на излекувани пациенти и тоа охрабрува и е дополнителна мотивација за лекарите во болниците и за матичните лекари. Досега се излекувани вкупно 272 лица, а најнови од нив се 48 лица, од кои шест се лекувале во болница и 42 во домашни услови“, соопшти министерот за здравство Венко Филипче попладнево на онлајн прес-кпонференција заедно со премиерот Оливер Спасовски.
„Бројките ни покажуваат дека имаме мал број на заразени возразни лица кои се најризична категорија за кои може да кажеме дека се заштитени токму поради досегашните мерки. Во последните три дена има последователно повеќе оздравени од новозаразени граѓани на Република Северна Македонија“, рече Филипче.
*
ДРЖАВНА МАТУРА Во однос на олабавување на мерките за кои одлуките ќе се донесуваат по 1 Мај, премиерот Оливер Спасовски одговарајќи на новинарско прашање рече дека во напредна фаза е одлуката за државната матура за учениците кои го завршуваат средното образование.
*
ОДЛУКА Владата денеска ја усвои Одлуката за утврдување распоред на работното време во Владата на Република Северна Македонија, министерствата и другите органи на државната управа,согласно со измените и дополнувањата на одлуката за ограничување на движењето.
*
ТРГОВИЈА Владата на Република Северна Македонија денеска донесе Уредба за примена на законот за трговија за време на вонредна состојба, соопшти владината прес-служба.
Со оваа Уредба во листата трговски објекти се додава зборот „дуќани” и се утврдува дека во објектите во кои се врши трговија на мало, истовремено може да пазаруваат најмногу по едно лице на површина од секои 20 метри квадратни, а во објектите со површина помала од 20 метри квадратни може да пазарува само едно лице.
*
НАДЗОР За ден – два се очекува да биде готов извештајот од вонредниот иснпекциски надзор во Куманово од страна на Државниот санитарен и здрваствен инспекторат кој треба да утврди дали има одговорност за тоа што по посетата на Општинскот кризен штаб на овој град во изолација се премиерот Оливер Спасовски, вицепремиерот за евроинтеграции Бујар Османи и министрите Венко Филипче и Арбр Адеми.
*
МОЈ ДДВ Владата на денешната седница донесе одлука за намалување на наградниот фонд на наградната игра „Мој ДДВ, МојаНаграда“ и за уплата на средствата во Фондот за помош и поддршка за справување со кризата предизвикана од коронавирусот КОВИД-19.
А. Петровска