Радува фактот што секојдневно имаме нови и нови излекувани пациенти. Денеска вкупно 18, од кои 13 на болничко и пет кои се лекуваа во домашни услови. Со ова бројот на излекувани пациенти во нашата земја е 139, изјави денеска министерот за здравтсво Венко Филипче.
Во изминатите 24 часа, посочи дека, имаме 36 нови случаи и за жал тројца нови починати.
– Со ова вкупната бројка на дијагностицирани пациенти во нашата земја изнесува 1117, односно 929 активни случаи. Во изминатите 24 часа направени се 437 теста и со тоа од почеток на епидемијата направени се вкупно 10.859 тестирања. Со оваа бројка сме на второ место во регионот по бројот на направени тестови на милиони жители, изјави Филипче.
*
Позитивна на коронавирус е вработена од Специјализирана болница за геријатриска и палијативна медицина „13 Ноември“ Скопје во Ѓорче Петров. Направена е епидемиолошка анкета во однос на контактите коишто ги имала со вработените, дел од колегите/колешките – веќе им е препорачана самоизолација.
„Од следната недела ќе пристапиме со серолошко тестирање на сите коишто се сместени во домовите за стари лица со цел да се направи една подобра проценка на нивната здравствена состојба“, рече Филипче.
Скрииниг на антитела е планиран во нашата стратегија, но не сега, туку некаде на средина или крај на летото, најави денеска министерот за здравство Венко Филипче. Посочи дека тестовите, ќе бидат со соодветни анализи и валидирани од комисијата за заразни болести.
„Планирано е да правиме скрининг по возрасни групи. Тоа е планот да го направиме веднаш по попуштање на мерките или некаде на лето, со цел да го процениме имунитетот на возрасните над 65 години, понатака на децата во школска возраст или на работоспособното население, изјави Филипче.
Тоа ќе ни биде еден еден од показателите за димензионирање на мерките, тогаш, кога евенетуално би сметале дека може да се соочиме со повторен пик на болеста.
„Дали тоа ќе биде на есен или не, ќе ја пратиме епидемиолошката криза и врз основа на тоа ќе дадеме мислење и за тоа како можеби ќе треба да се организира наставата во училиштата. Доколку се процени дека нема имунитет на возрасното население над 65 години, може да кажеме дека рестриктивните мерки за нив ќе важат цело време до крајот на годината“, изјави Филипче.
*
Министерот за здравство, Венко Филипче годинава Велигден одлучил да го помине сам изолиран од семејството, со цел да ги заштити најблиските.
„Секој од нас носи огромна одговорност и за тоа мора да сме сите свесни. Празничните собирања оваа година треба да изостанат. Тоа е инвестиција во најважното, во здравјето. Тоа е единсвтениот начин со кој можеме сите како поединици да дадеме свој придонес во борбата со вирусор кој го смени животот на милиони луѓе ширум светот, изјави Филипче.
Да се биде дома, порача Филипче, значи да се направи разлика и да се спасат човечки животи и да се помогне на здравствените работници, кои овој празник ќе го поминат на работните места во борба за секој живот.
*
Бебето родено на 14 април во ЈЗУ Клиника за гинекологија и акушерство – Скопје, чија мајка е заразена со коронавирус, е негативно на резултатот за COVID-19, соопштија од ЈЗУ ГАК -Скопје.
*
Кривичниот совет го прифатил барањето и поднесената гаранција од Зоран Милески-Кичеец за укинување на домашниот притвор одреден до правосилност на тригодишната затворска казна во случајот „Рекет“. Домашниот притвор е укинат пред две недели од Кривичниот совет со гаранција од недвижности, проценети над 13 милиони денари.
Дехран Муратов
Во соработка со Диана Тахири
