ИНФОРМАЦИИ Министерот за здравство преку својот ФБ профил ги повика сите граѓани да се приклучат на „Коронавирус МК Koronavirus“ Вибер заедницата. Линк за вклучување: https://vb.me/mk_gov.
*
ОДЛУКА Уставниот суд едногласно ја донел одлуката за поведување постапка за оценување на уставноста и законитоста на Уредбата со законска сила за определување на висината на платата на избраните, именуваните и назначените лица во јавниот сектор за време на вонредна состојба и за Уредбата со која таа се дополнува, соопшти Судот откако Владата реагираше на неговата одлука.
*
ИЗМЕНИ Советот на Народната банка на редовна седница донесе регулаторни измени со коишто се овозможува банките и штедилниците со промена на договорните услови да го олеснат финансискиот товар и на кредитокорисниците на кои кредитот им е одобрен во периодот од 1 до 24 март оваа година.
*
ЖИВОТНА СРЕДИНА Министерството за животна средина и просторно планирање информира дека e донесена Одлука за избор на програми, проекти и активности кои ќе се финансираат од Програмата за инвестирање во животната средина за 2020 година, а резултатите се објавени во „Службен весник на РСМ“ број 108 од 24 април 2020 година.
*
МЕРКИ „Владата предводена од СДСМ се грижи за сите и преку пакет различни мерки за различните категории граѓани, преку иницирање солидарно однесување во општеството, ќе направиме сè ударот од кризата да биде најмал“, напиша денеска претседателот на СДСМ Зоран Заев на својот Фејсбук профил.
*
ИЗЈАВА Транспортот на стоки и услуги во ниеден момент, освен случајот до пред извесен период со Република Турција, нема никакви проблеми. Тоа беше добро координирано и со МНР и со МВР за проблемите на границите низ Европа, истакна вечерва министерот за транспорт Горан Сугаревски во интервју на 24 Вести.
*
СЕДНИЦА Банкарскиот систем е подготвен да се справи со шокот од корона-кризата, стои во Извештај за ризиците во банкарскиот систем во 2019 година усвоен на редовната седница на Народната банка. Како што соопшти денеска централната банка, податоците и констатациите во Извештај потврдуваат дека системот е здрав и стабилен и поставен на цврсти основи, како и дека е подготвен да се справи со различни шокови, вклучително и со неповолните ефекти од тековната здравствена криза.
*
ИСТРАГА Од обвинителот на Основното јавно обвинителство се добиени нови насоки за оперативни дејствија за расветлување на случајот со починатите мајка и син и припадниците на МВР постапуваат по нив, информира портпаролот на СВР Велес Верољуб Додевски на денешната прес-конференција. Тој потсети за настанот кога на 6 април во 10:30 часот во нивниот стан на улицата „Ѓорѓи Војтех“, поранешна „4 Јули“ во Велес мртви беа пронајдени мајка и син, а посмртно се утврди дека мајката починала од КОВИД-19.
А. Петровска
