РЕШЕНИЕ Уставниот суд на денешната седница ги укина посебните ограничувања за движењето за пензионерите и малолетниците. Судот донесе решение за запирање на извршувањето на поединечни акти или дејствија што се преземени врз основа на Одлуката за посебен режим за движење на помладите од 18 и на повозрасните од 67 години. Со тоа, овие лица ќе можат да се движат како и останатите граѓани, од 5 до 19 часот.
*
НАТО Началникот на генералштабот на Армијата, генерал-потполковник Васко Ѓурчиновски, денеска првпат како полноправен член, учествуваше на 183-тото редовно заседание на Воениот комитет (ВК) на НАТО, највисокото воено советодавно тело на Алијансата.
*
ЕКОНОМСКИ МЕРКИ Целта на новиот економски пакет на Владата е стимулирање на јавната и приватната потрошувачка, објави лидерот на СДСМ, Зоран Заев на Фејсбук.
„Со новиот економски пакет ги стимулираме и јавната и приватната потрошувачка. Ќе стартуваат проекти кои беа планирани за 2021 или 2022 година. Се работи за водоводи, патишта, канализации, гасификацијата, железници, училишта и градинки. На тој начин ќе го активираме градежништвото, а тоа придвижува и 72 други гранки со него“, наведува Заев во објавата.
*
ИЗБОРИ „Одговорно е да имаме избори во првиот возможен рок, во моментот кога здравствените власти тоа ќе го препорачаат. Декември е крајниот термин кога според уставните рокови ќе мора да одржиме избори. ВМРО-ДПМНЕ се контрадикторни, бидејќи ако немаме функционално Собрание ќе влеземе во опасно сценарио, кога ќе мора вештачки да воведуваме вонредна состојба само за да го одржиме системот функционален. Тоа е неодговорно“, порача потпретседателот на СДСМ и министер за информатичко општество и администрација Дамјан Манчевски,на денешната дебата на „Само вистина“.
*
„Ставот на СДСМ е избори во првиот можен рок, веднаш по завршување на вонредната состојба, кога тоа ќе го препорачаат здравствените експерти“, истакна портпаролот на СДСМ Коста Костадинов, во емисијата „Клик плус“ на ТВ21.
*
ПРЕСУДА Управниот суд денеска на својата веб страна ја објави пресудата за рудникот „Иловица“.
„Поради покажаниот голем интерес на медиумите, а со цел објективно информирање на јавноста во врска со поднесената тужба од тужителот Друштво за производство, промет и услуги „Еуромакс Рисоурсес“ ДОО Скопје изјавена против решението на Државната комисија УП.број 0810 – 102 од 5 9 2019 година, Управниот суд ја извесува јавноста дека од страна на судот е донесена пресуда У-6 број 575/2019 од 31.03. 2020 година“, се наведува во соопштението од Судот.
*
ОДЛУКА Косовската Агенција за храна и ветеринарство денеска соопшти дека вчера донела одлука за привремена забрана за увоз на јајца и живина од земјава, поради сомнеж за појава на болеста Њукасл, односно птичја чума.
